Palin Alaskami guvernøritut unnuaq tunuarpoq

Alaskami guvernøriusoq partiimit republikanerineersoq Sarah Palin guvernøritut unnuaq tunuarpoq, uffa Alaskami ukiup aappaata qeqqani suli guvernøriusinnaagaluarluni. Sarah Palinimik taarsiisuuvoq Sean Parnell, maannamut viceguvernøriusoq.
Allattoq Najaaraq Egede
juulip 27-at 2009 07:42

Sarah Palin kinaanersoq ilisimaneqalerpoq USA-mi kingullermik præsidentissarsiornermi John McCainip vicepræsidentissamisut toqqarmagu. Ilisimaneqartutut siorna præsidentinngorpoq Demokratit qinigassanngortitaat Barack Obama.

Sarah Palinip tunuarnissi juulip ulluisa pingajuanni nalunaarutigimmaguli suna pillugu tunualernera eqqoriarneqaqattaarsimavoq, ilaasa siunissami USA-p præsidentissaatut qinigassanngortinniarnera pasitsaakkaat ilaasa allamik peqquteqassangatikkaat.

Sarah Palin maannamut oqaannartarsimavoq guvernøritut tunuaraluarluni Alaskami innuttaasut sullittuarumaarlugit.

Nutaarsiassaqartitsiviup CNN-ip qinersisartunik isumasiuinerata takutippaa, tullissaanik præsidentissarsiortoqalerpat republikanerit qinigassanngortitassaattut piukkutat tassaasut Sarah Palin, aamma Massachussetsimi guvernøriusimasoq Mitt Romney kiisalu Arkansas-mi guvernøriusimasoq Mike Huckabee.

USA-mi præsidentimut tullianik qinersisoqassaaq 2012-imi.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq