Palasitaassaq Aarhusimi najugaqassaaq
- Tamanna naalakkersuisunut pingaaruteqarpoq tassami Danmarki Kalaallillu Nunaat imminnut qanittuararsuarmik attaveqarmata, aammalumi allami najugaqaraani inuuneq unamminarsigaangat inuttut anersaakkullu immersorneqarnissap pisariaqartinneqalersarnera akuersaaratsigu. Inuunitsinnilumi taama pisariaqartitsilersarnerput annertoorujussuusarpoq, Manu Sareen oqarpoq.
Manu Sareen oqarpoq. Taanna Ilagiit aningaasaqarnerannik allannguisussamik, ataatsimoorussamillu aningaasaateqarfimmik taaneqartartup siunissami Danmarkimi kalaallit suli ataatsimik palaseqarneranut ukiumut 1 millionit koruuninik akiliuteqarneranik kinguneqartussamik, februaarimi inatsisissatut siunnersuummik saqqummiussissaaq. Siunnersuut akuersissutigineqareerpat naatsorsuutigineqarpoq atorfiup maajimi juunimiluunnit inuttassarsiuunneqarnissaa Manu Sareenimit naatsorsuutigineqarpoq.
- Atorfinitsinneqartoq Aarhusip palaseqarfianiissaaq, tassami Københavni eqqaassanngikkaanni kalaallit amerlanerpaat tamaani eqqaanilu najugaqarmata. Taamaliornikkut palasip nunap sinnerani sulisinnaanera mattunneqanngilaq. Soorunami palasi aamma taamaaliorsinnaavoq.
Danmarkimi palasi, Jens Kristian Kleist kalaallinik napparsimasunik parnaarussanillu sullisseqqaartussaavoq, aammali kalaallinut nammineq piumassutsiminnik Danmarkimut nuussimasunik periarfissaatillugu ilageeqarnikkut sullissisarluni. Taamaaliortarninilumi aamma taamaatittariaqanngikkaa, Ilageeqarnermut ministeri isumaqarpoq.
- Nammineq piumassutsiminnik nuussimasunut sullissisarnera aamma tusartarpara. Sullissisarnini ingerlatiinnarusunnerlugu imaluunniit namminneq piumassutsiminnik nuussimasut pillugit, palasit taakku marluullutik qanoq isumaqatigiissuteqartassanerlutik, tamanna namminneerlutik aalajangertassavaat. Ileqqutoqqammi maliinnartariaqanngillat. Ikioqatigiittoqarsinnaavormi, taanna oqarpoq.
Nutaarsiassaq kalaallit folketingemut ilasortaatitaasa marluusut nuannaarutigeqaat. Kalaallinut namminneq piumassutsiminnik Danmarkimut nuussisimasunut nutaarsiassaavoq pitsaasoq, Doris Jakobsen oqarpoq. Qinersineq sioqqullugu Siumup Helle Thorning-Schmidt neriorsuitissimavaa, Danmarkimi kalaallit suli ataatsimik palaseqarnissaat sulissutigeqqullugu taamaatumillu maannakkut angusaasoq namminneq nersorneqaatigerusullugu. Aammattaaq IA-meersup Sara Olsvigip pisariaqartitsineq maluginiarsimavaa angusaasorlumi aamma naammagisimaarlugu.
- Kalaallit Danmarkimiittut kulturitsinnik attassiinnarnissaminnik kissaateqarput kalaallinullu Danmarkimiittunut attaveqarusuttarlutik, tamannalumi ingerlatiinnarneqarsinnavoq kalaallisut naalagiartitsinernut orniguttarnikkut, taanna oqarpoq.
2010-ip aasaaneranili kalaallit Danmarkimiittut pitsaanerusumik iluarsiissuteqarfiginiarlugit Naalakkersuisut Ilageeqarnermut ministeriusimasumik ataatsimeeqateqarsimavoq. Tamanna kinguneqarpoq Ilageeqarnermut ministerip suleqatigiissitamik pilersitsineranik. Naak suleqatigiissitap nalunaarusiaa Manu Sareen-ip isiginiarsimagaluarlugu taamaattoq kalaallit kissaateqarnerisa naalakkersuisunngortunit malinneqarusinnera aallaqqaataaniilli nalunarsimanngitsoq, tassuma oqaatigaa.
Danmarkimi maannakkut palasiusup Jens Kristian Kleistip naalakkersuisut palasimik suli ataatsimik atorfinitsitsiniarnerat pillugu nutaarsiassaq nuannaarutigaa. Tamanna ajunngilluinnarpoq, KNR-mut ullumi oqarpoq.
