Palasitaarnissaq kinguaattoorpoq
Kalaallit Danmarkimi najugaqartut namminneq oqaatsitik atorlugit katinniartut apersortitsiniartut kuisitsiniartulluunniit utaqqilaartariaqassapput.
Kalaallit palasissaattut atorfiup nutaap qaammatip ataatsip qaammatilluunniit ataatsip affaataluunniit affaata ingerlaneranni aatsaat inuttarsarsiorneqarumaartoq Aarhus-imi biskop-ip Kjeld Holm ullumi KNR-imut oqarpoq. Inuttassarsiornissaa maajimi juunimiluunniit pissasoq neriorsuutaanikuugaluarpoq.
Aarhus-imi Kalaallit Illuutaanni kalaallimik palaseqalernissaq naammagittarluni utaqqineqarpoq.
Ilagiinnut ministereqarfimmit aningaasaliinissaq sivitsoruttoorneqarpoq.
- Aningaasaliifffigineqarnerata qulaakkeernissaa aasaq qaanngiuppat inississaaq, maannalu atorfinitsitsinissamut oqaluffeqarfimmullu sorlermut attuumassuteqarnissap inissinnissaa utaqqineqarput, Aarhus-ip biskoppia oqarpoq.
Aarhus-ip biskop-ia Aarhus-imi Kalaallit illuutaannut aamma Kalaallit Nunaanni biskop-imut attaveqarniarpoq, taakkua isumaat tusarniarlugit.
- Kalaallimik palasimik atorfinititsisoqarpat, kalaallinut ingammik Fyn-imi Jylland-imilu najugaqartunut kulturikkut siuariarnerussaaq, Aarhus-imi Kalaallit illuutaanni forstanderi Svend Kolte oqarpoq.
Kalaallit Danmarkimi najugaqalersimasut palasi København-imi najugalik Jens Kristian Kleist Namminersorlutik Oqartussani atorfeqartoq, periarfissaqartillugu kuitsinermi katinnermi apersortitsinermi ilisinermilu palaserineqartartoq, aasarmannamiit palasitut atorsinnaajunaarpaat, Namminersorlutik Oqartussat taakkununnnga aningaasaliisarnertik untsimmassuk.
Maanna kalaallit Danmarkimi najugaqalersimasut palasinut danskinut taamaallaat saaffiginnissinnaalerput.
- Soorunalimi tamanna ernumanartittorujussuuarput, tamannalumi aamma palasinngortussamut ernumanarnerussaaq. Kalaallinut Danmarki-imi najugaqalersimasunut Namminersorlutik Oqartussat pisussaaffiliisimanerat sukannersumik atuutsippaat, tassani pisariaqavitsinnagu naalagiartitsinissanut neqerooruteqartoqarsinnaanngitsoq oqarlutik.
- Kisianni tassa Namminersorlutik Oqartussat taamatut aalajangiisinnaatitaapput, qujanartumillu aaqqiissutissanik allanik nassaartoqarsinnaammat tamanna ajunngilaq, Aarhus-imi Kalaallit illuanni forstander-i Sven Kolte oqarpoq.
Kalaallit Danmarkimi najugaqartut palaseqarnerannut pissutsit maanna atuuttut Biskop-ip Kjeld Holm arajutsisimanngilai, tamanna aaqqinniarlugu Kalaallit Nunaani biskop-i attaviginiarpaa, atorfininnissamut kusanartumik ajunngitsumillu allagarsiisoqarniassammat.
Palasitut atorfinitsinneqartussaq Aarhus-imi najugaqassaaq, kalaallit amerlanerit tassani najugaqarmata.
Danmarkimi kalaallimik palasimik atorfinititsinissamut aalajangerneq danskit ilageeqarnermut ministeriata Manu Sareenip nalunaarutigigamiuk oqaatigaa, palasinngortussap nammineerluni aalajangerumaaraa, kikkunnik sumilu naalagiartitsisassanerluni, naatsorsuutigalugulu Danmark-imi kalaallit palasii marlunngorpata taakkua ikioqatigiikkumaartut.