Palasit ukiukitsunik atornerluisarsimanerat annertooq

Ataatsimiititaliarsuup nalunaarusiaq naammassineqanngitsutut oqaatigisani saqqummiuppaa. Taanna inunnut 488-inut saaffiginnissimasunut isiginnittuusimasut oqaluttuaasa ilaannik imaqarpoq.

Ataatsimiititaliarsuup siulittaasua saqqummiussinermi oqarpoq ataatsimiititaliarsuup ilaasortaasa kikkulluunniit atornerluinerit isiginnittuusimasunit nassuiarneqartut qanoq isikkoqarnerannut piareersimasimanngitsut.

Taakkua tamarmik suliap ingerlanerani Guutimut, ilagiinnut inoqatinullu uppernerput apeqqusertariaqarsimavaat, Peter Adriaansens oqarpoq.

Atornerluinerit pingajorarterutaasa aappaat nukappiaqqanut tunngasuusimapput, taakkunannangalu amerlaqisut aqqaneq-marluk missaanni ukioqartillutik atornerlunneqaqqaartarsimallutik. Aammattaarli niviarsiaqqat atornerlunneqartarsimapput, nalunaarusiamilu taakkua qanorluunniit ukioqaraluarunik ulorianartorsiortutut inissisimasarsimallutik. Nalunaarusiaq naapertorlugu atornerlunneqarsimasut ilagaat niviarsiaraq marlunnik ukiulik.

Ataatsimiititaliarsuup misissuinerani nalunarunnaarpoq atornerluisut paasineqartut 95 procentii toqoreersimasut, 91-it suli uumapput. Pisarsimasut nalunaarsorneqartut 1930-imiit ullumikkumullu pisarsimapput. 1960-ikkut 1970-ikkullu tassaapput ukiut qulikkuutaat atornerluisarsimanernik amerlanerpaamik nalunaarsuiffiusimasut.

Belgiami palasiuneq siornatigullu biskoppiunerusimasoq qanittukkut utoqqatserpoq biskoppi suliunnaarsissimannginnamiuk, tassami apriilimi paasigamiuk soralussani atornerlussimagaa, aamma tamatumunnga peqatigitillugu nuannarinngilaa immiussap nipitaata tamanut saqqummiunneqarnera, nammineq atornerluinermik isertuussiniarsimanerminut uppernarsaataasoq, taavalu biskoppi soraarsinneqarani nalinginnaasumik soraarninngorluni.

Nalunaarusiaq tamarmi internettikkut ullumi tamanut saqqummiunneqarpoq. Tassani ilagiit kajumissaarneqarput palasit mattuttullu arnat meeqqanik eqqarsartaatsikkut atornerluisimanersut nakuusertarsimanersulluunniit misissorneqassasut.