Palasit aniatitsivissaaleqisarput

Palasit nipangersimasussaatitaasarput. Piffissamili kingullermi Nuummi pisorpassuit, soorlu imminornerit arlallit, pinerisa kingorna palasit annikilliuutit misigisalerpaat. Palasimik oqaloqateqarusuttut nukissaqarfigilerumallugit ikiortissarsiornissaq pisariaqalerpoq. Palasit qanoq ilagiinnit pisariaqartinneqartartiginersut, domprovst Emma Balslev-ip ima oqaatigaa.

- Uagut allattuisannginnatta aammalu nalunaarusuisarata. Aggersup nalunngereertarpaa palasi oqaloqatissani ingerlatitseqqittussaanngitsoq, nipangersimasussaatitaaneq pissutigalugu, taamaattumik eqqissilluni eqqarsaatigisimasani imaluunniit misigisimasani artornartut tunniussinnaasarpai ilisimallugu allanut ingerlaqqissanngitsut, Emma Balslev oqarpoq.

Palasit Nuummiittut piffissami kingullermi imminortorpassuit eqqarsaatigalugit assut suliassaqartarput. Aniatitsivissaaleqisutullu maanna misigisimapput.

-Ulluinnarni nalinginnaasumik taamatut annikilliulernermik imaluunniit ikiortissaasuanermik misigisanngikkaluarpugut, kisianniuna piffissami kingullermi Nuummi sakkortuunik akulikitsumillu pisoqaqattaarnerata kingunerisaanik pisariaqartilersimagipput oqaloqatigiissutiginissai. Taamaammat pulaartoqartussaavugut, Bente Hegelund (Paasisami siunnersorti palaseqarfiup allaffianukassaaq, aaqq.), tamaannartussaavoq oqaloqatigalutalu, Emma Balslev nangippoq.

Nuummi palasit neriupput iluaqutigissallugu.

- Oqaloqatiginnittarnitsinni taavalu sakkortuumik pisoqartillugu peqataasarnitsinni aamma nukillaarsannginnatta, ilaa? Nukissaqarniassagatta aamma allanut tunniussinissamut. Taamaammat pisariaqartissimavarput ikiorneqarnissaq aamma, Emma Balslev oqarpoq.

Erseqqissaatigaa palasit pisarnertut saaffigineqarsinnaajuartut.

Palasiunngitsumik oqaloqatissaaleqigaanni oqarasuaat Peqatigiiffiup Kisimiinngilatit-p, Paarisa suleqatigalugu, ingerlataa, 32 41 44 aamma saaffigineqarsinnaavoq.