Palasi soraarneq Motzfeldt Hammeken toquvoq
Mutti Ilinniarfissuarmi ilinniartooreerluni naammassigami ajoqitut sulilerpoq siullermik Kangermi. 1944-mi ilaqutariit Nuummut nuupput, tassani Mutti ajoqitut landsprovstillu allaffiani ikiortitut suleqataalluni.
Mutti 1960-mi palasinngortitaareerluni Qeqertarsuatsiaani palasinngorpoq, 1962-imi Paamiuni palasinngorpoq ukiorpassuit tassani palasiulluni. 1976-mi qallunaat nunaanni kalaallit palasiattut sulilerpoq 1984-milu Nuummut uterluni.
Mutti ilagiinni sullissinermini tunniusimalluartuuvoq, suleqatinit ilagiinnillu tatigineqarluni nuannarineqaqalunilu. Ilagiit Muttimit sullinneqarsimasut qujassutissaqarfigeqaat uagullu suleqataasimasugut Muttimut qujassutissaqaqaagut. Ikiuiumatuujugami saamasorsuullunilu ornikkuminarpoq, sulinerminilu tamani ilumoorluni ikiuivoq. Soraarninngoreeraluarlunilu Nuup palaseqarfiani ukiorpaalussiut sulilluni Mutti tatigisaagami suliffimmi avataagut arlalinnik pisussaafilerneqartarpoq soorlu Testamentitoqaq nutserneqalermat peqataasimasoq. Mutti Ridder af Dannebrogimik saqqarmioqarpoq, Namminersornerusullu nersornaammik saqqarmiuliuttagaa kultiusoq pigalugu. Muttip eqqaaneqarnera ataqqinartuuli.
Qeqqata provstia Emma Balslev taama eqqaaniaalluni allappoq.
