Palasi kisimiikkunnaassaaq

Danskit Ilageeqarnermut ministeriata, Manu Sareenip Naalakkersuisumut ippassaq nalunaarutigaa, Danmarkimi Ilagiit aningaasaqarnerannik allannguisussamik inatsisissatut siunnersuummik saqqummiussaqarniarluni.

Akuerineqassappallu tamatuma kingunerisinnaava, kalaallit suli ataatsimik palaseqarnissaat Danmarkimit aningaasalersorneqarsinnaassasoq.

Ministerip taamma nalunaruteqarnera Mimi Karlsenimit nuannaarutigineqarpoq.

Kalaallit Danmarkimiittut ilageeqarnikkut  sullinneqarnerat ukiuni kingullerni marlunni nalornissutaasimavoq. 2010-p aasaaneranili Mimi Karlseni Ilageeqarnermut ministeriusimasumik Birthe Rønn Hornbechimik aaqqiissuteqarnissaq anguniarlugu ataatsimeeqateqarsimavoq.

Maannakkut palasiusoq, Jens Kristian Kleist kalaallit namminneq piumassutsiminnik Danmarkimi najugaqalersimasunut pinnani, kisianni aallaavittut kalaallinut napparsimasunut kiisalu parnaarussanut sullisseqqaartussaatitaavoq.