Palasi kalaaleq, Danmarkimi palasinngornissaminut qilanaarpoq
- Kalaaleqatitta namminneq oqaatsitik tunngavigalugit naalagiartinneqartarnissaat pilerinartippara, Oline Berthelsen oqarpoq.
Kalaallit Danmarkimi najugaqartut qangali piumasarisarpaat, namminneq oqaatitsik atorlugit naalagiartinneqartarnissartik, taamatullu meeqqat kuisinneri aamma apersortitsinerit kalaallisut oqaluussinertalimmik pisarnissat kissaatigineqartarluni.
- Ilimagaara tamakku suliassama ilagiumaaraat. Kisianni suleqatissakka tassani apeqqutaassapput, tassami qaninnertut suleqatissaraakka, Kalaallit Dnamarkimi kattuffiat, Inuit aamma ilagiit sinniisaat Aarhusimmiittut, palasi Oline Berthelsen oqarpoq.
Kalaallit namminneq piumassutsiminnik Danmarkimimut nuuttut, kalaallimik ataasiinnarmik palaseqarneq, ukiorpassuarni naammagittaalliutigisarpaat. Tamatumalu kinguneranik, palasi ukiorpassuarni ataasiinnaasimasoq, siorna 2013-imi aaperneqaraluarluni. Taamanili atorfinitsitsinermut atatillugu, palasinngortup billitti aamma pisattat assartorneqarneri, Aarhus stift-mit akilerusunneqanngillat.
Taamaattumik Oline Berthelsenip atorfinitsinneqarnermini, Aarhus Stift-imut piumasarisaata ilagaat, nuunnermini billittit akilerneqassasut taamatullu pisattat umiarsuakkut nassiunneqarneri, Aarhus Stift-imit aamma akilerneqassasut piumasaralugu.
- Nunatsinniit Danmarkimut billitti utimullu, Aarhus Stift-ip akilissavaat, initaarnissarali nammineq unaga isumagisussaavara. Danmarkimi kalaallit ilagiit palasissaat, Oline Berthelsen taama oqarpoq. Taanna ukiuni 14-ini palasitut atorfeqareerpoq.
