Palæstinamiut siuttuat Trumpimut itigartitsoq: Jerusalaat tuniniagaanngilaq
USA-p præsidentiata, Donald Trumpip, israelimiut palæstinamiullu eqqisseqatigiinnissaannut pilersaarutaa palæstinamiunit itigartinneqarpoq.
Trumpip eqqisseqatigiinnissaannut pilersaarusiani Det Hvide Husimi saqqummiutereeraalu tamanna pivoq.
Palæstinami namminersorlutik oqartussat siuttuata, Mahmod Abbasip, pilersaarut peqatigiinniapilunnertut taavaa, pilersaarullu akuerineqarnavianngitsoq oqaatigalugu.
AAMMA ATUARUK Trump eqqisseqatigiinnissamut pilersaarut pillugu: Palæstinamut aamma iluaqutaassaaq
Palæstinamiut nunaannik pilersitsisoqarlunilu, palæstinamiut Jeruusalaap kangisissortaani pingaarnertut illoqarfeqarnissaat Trumpip pilersaarutigaa, Israelimiullu nunassinnikut taassuma saniatigut ataannarnissaat aamma pilersaarutigalugu.
Pilersaarulli taamaattoq piviusorsiornerunngitsoq, Mahmoud Abbasip oqaatigaa.
- Jerusalaat tuniniagaanngilaq, Mahmoud Abbas oqarpoq nangillunilu:
- Pisinnaatitaaffigut tuniniagaanatillu isumaqatigiinniutigineqarsinnaanngillat.
Donald Trumpip Kangia Qiterlermi eqqisseqatigiittoqarnissaanut pilersaarutaa oqaluttuarisaanerup eqqaavianut igiinnarneqarnissaa pissusissamisoortoq, palæstinamiut siuttuata ilanngullugu oqaatigaa. Nutaarsiassaqartitsivik DPA taama allaaserisaqarpoq.