Pakistanip præsidentiata Ashwar Kiani sakkutuunut qullersanngortippaa

Pakistanip præsidentiata, Musharrafip ilimageriikkatut arfininngorpat qinersinermi præsidentitut qinerneqassaguni, kilitsissiat pisortarisimasaat, sakkutuunut qullersatut kingoraartissamisut toqqarpaa.
Allattoq Oline I. Olsen
oktobarip 02-at 2007 15:38

Kilitsissiat pisortarinikuusaat Ashwar Kiani, generaliuvoq, sakkutuunullu qullersassatut toqqarneqarnera USA-miit soqutigineqaqaaq. Pakistanimimi naalakkersuisut Al Kaidameersut, Afghanistanimullu killeqarfiup eqqaaniittut talebanit, akiorniarnerinut pimoorussineroqqullugit USA-miit saaffigineqartarput. Naatsorsuutigineqarpoq Musharrafip novembarimi præsidentitut ivertinneqannginnerani Kiani sakkutuut qullersaattut ivertinneqassasoq. Taamaalilluni Musharrafip sakkutuutut atisami ateqqinnginnissaannik neriorsuutini eqquutsilersaaraa ilimagineqarpoq. Tusagassiorfiilli aamma maluginiarpaat sakkutuut aamma siunissami politikkikkut ineriartorneq sunneeqataaffigiuassagaat, naak Kiani sakkutuut qullersaattut Musharrafimut naleqqiulluni tunuarsimaarnerujumagaluartoq.