Pakistanimiut qimaasut ajortumeerinianit nerisinneqartarput

- Qimaasut ornittagaannut meeqqat ajortumeerinianit nerisinneqartartut oqaatigineqarsinnaavoq. Qimaasut uuliamik qillertuusamik tunitikkaagamik Jihadimik, tassa sorsunneq illernartumik, oqaluuseritittarput. Sakkulersortut eqqummaarissunik tusarnaartoqarnertik atorluarniartarpaat. Aviisip New York Timesip qimaasut takusarsimavaat qanorlu nerisassanik agguaasarnersut takullugu. Illoqarfeeqqamit Swatimit qimaasut nunat killiit ikiuutissaannik utaqqineranni Amerikamut akerliullutik suliniaqatigiit sukkasuumik sulisimapput. USA-p kronet milliardip affai tikillugit toqqinut, imermik minguitsumut kiisalu nerisassanik Pakistanimut nassiussuisimagaluarpoq, Amerikamiullu nammineq nassiussatik agguaanneq ajorpaat ikiorsiiniutillu ilumut anngussimanersut ilisimaneqanngilaq. Taamaammat qimaasut maanna ingasattajaaralutik islamisiortut annaassisimittut isigilersinnaavaat. Taakku sakkortusaarniat ilaat qimarnguinnut iseqqusaajunnaarsimapput, allamilli atseriarlutik iseqqittarlutik. New York Timesilu malillugu taakkuupput Swatimit qimaasunut perlilertunut nerisassanik suli agguaasut.