Pakistanimi saassussisoqarmat 39-t ajunaarput

Pakistanip killeqarfiata eqqaaniittumi pinerliiniartartut akiorneqarnerat Lahoremi innuttaasut miliuunilikkaat ullaap tungaa tamaat tv-ikkut toqqaannartumik nalinnaavigisinnaasimavaat. Politiinngorniat atuarfii marluk illoqarfimmilu politiit qullersaqarfiat pinerliinartartut saassuppaat, Lahoremilu toqutaasut pinerliiniartartut politiillu katillugit 18-iupput. Saassussinernut kikkut akisussaasuunersut suli ilisimaneqanngilaq. Vasiristanimili Talibanit tammaarsimaartarfiinik saassussinissaq Pakistanimi sakkutuut pilersaarusiuinnarpassuk taama iliornissaq Talibanit sapaatit akunneri arlallit matuma siorna siorasaarutigaat.

Illoqarfimmi Rawalbindimi sakkutuut qullersaqarfiat sapaatip akunnerata naanerani Talibaninit saassunneqarpoq, inuillu 40-t sallunaveeqqutitut tigusarineqarlutik. Tigusarinnittut saassunneqarneranni inuit 20-t toqutaapput.

Talibanit saassussinissamik siorasaarineranniilli Afghanistanip killeqarfiata qanittuani nunap immikkoortuini arlaqartuni imminut toqoriaatigaluni qaartartumeerinernit inuit 100-nik amerlanerusut toqutaasimapput, kingullerpaamik ullaap tungaani arfineq-pingasut toqutaallutik.

Sumiiffimmi Talibanit sakkortuumik saassunneqarnissaat ilimagineqarsinnaammat Visiristanimi innuttaasut tusindilikkaat qimarratilersimapput.

Qaartartunik ungasissumut igeriuttakkanit timmisartuniillu maanna saassunneqartalereerpugut, angut biiliminiit ilaquttaminik pequtinillu pisariaqartinneqarnerpaanik ulikkaartusimasumiit oqarluttuarpoq. Maaniissinnaanngilagut taamaammat qimaaniarluta aalajangersimavugut.

Pinerliiniat Lahoremiittut maanna ajugaaffigineqarsimalerput. Ullaap tungaanili, nunatta nalunaaqutaa malillugu, Afghanistanip killeqarfiata qanittuani pakistanimi illoqarfimmi Peshawarimi inuit najugaqarfianni qaartartoq qaarpoq. Toqutaasut qanoq amerlatiginersut suli nalunaarutigineqanngilaq.