Pakistanimi qinersinissaq kinguartinneqarpoq

Qinersineq januaarip ulluisa arfineq-pingajuani ingerlanneqartussatut pilersaarutigineqaqqaaraluartoq, præsidentitut qinigassanngortikkaluartup, Benazir Bhuttop, toqutaanera pissutigalugu kinguartinneqarpoq.

Perulluliortoqaqattaarnerani manna tikillugu inuit 58-it toqutaammata, koruunillu milliardit arlallit nalinginut aserortserisoqareermat, qinersinissaq kinguartinneqartoq, qinersineq pillugu ataatsimiititaliap oqaaseqartartua tusagassiortunik katersuutsitsinermi oqarpoq.

Ataatsimiititaliap oqaaseqartartua oqarportaaq kiffaanngissuseqarluni naapertuilluarlunilu qinersineqarsinnaalernissaa anguniarlugu pilersaarusiornermut piffissaq atorneqartariaqartoq.

Pakistanip immikkoortortaani sisamani naalakkersuisut aatsaat februaarip ulluisa arfineq pingajuani qinersisoqarnissaa kissaatigisimagaluarpaat, islamisiortummi qaammat illernartuutitaat, Muharram, ulloq taanna naammassissammat, islamisiortut qaammatisiutaat malillugu qaammammi siullermi upperniaqatigiit assigiinngitsut perulluliulernissaat annilaangassutigigamikku.

Bhuttomik toqutsinerup kingorna Pakistanimi tamani perulluliortoqarsimavoq, nunalli kujasinnerusortaani, immikkoortortami Sindh-imi, perulluliornerit ingasalluinnarsimapput.

Bhuttop partiiata PPP-p qinersinissamik kinguartitsineq nunap qanoq ittumik inatsiseqarneranik unioqqutitsinertut isigalugu oqaatigaat.