Pakistanimi præsidenti atorfimmini ilungersungartorsiuleruttorpoq:
Pakistanimi præsidentip Musharraf-ip sakkulersorlutik akiuuttartoqatigiit tunniutiinnaqquai.
-Tunniutiinnanngikkussi toqutaarataannaavusi, Pervez Musharraf paatsuugassaanngitsumik oqaaseqarpoq.
Akiuuttartoqatigiit Islamabadimi qinusarfissuarmik ullut tallimassaa tiguaaqqapput.
-Tiguaanertik unitsittariaqarpaat, tunniutiinnartariaqarput sakkutillu tunniullugit. Taamaaliunngikkunik toqutaasinnaapput, Musharraf tiguaanerup kingorna aatsaavissuaq pisortatigoortumik nalunaartoq oqarpoq.
-Nunami oqartussaasut sakkussaqarluarput, kikkulluunniit pissaanerput akiorsinnaanngilaat, Musharraf, Pakistanimi nammineq naalakkersuisunik 1999-imi tassanngaannarnikkut uppititsisuusoq oqarpoq.
Erseqqissaatigaalu naalakkersuisutut maannamut iliuuseqarsimannginnerminnut pissutaasoq, oqartussat arnat meeqqallu tiguaasunit ajortumik pineqarnissaat aarleqqutigimmassuk.
Ilinniartut aamma sakkulersorlutik akiuuttartoqatigiit marlunngormalli Qinusarfissuarmi aappaluttumik taasami Lal Masjid-imi katersuupput. Isumannaallisaaniallu sakkutuuisa tiguaasunik akiuineranni maannamut inuit ikinnerpaamik 19-it toqussimagaat, Nutaarsiassaqartitsivik Ritzau allappoq. Præsidenti aamma ilisimatitsivoq qinusarfissuarmik tiguaasut ilaat 1.300-t tigusarineqareersut.
Eqqarpalunnerit ullumi aamma tusarsaajuarsimapput.
Musharrafip Pakistanimi præsidentiuneranik akerlerinnittut, Musharrafimik maanna aamma tunuaqqusilerput.
- Pakistanip iligiinnik USA-mit siulersorneqartunik illersuisutut, nunanit tamalaanit ilisimaneqalernera, qinusarfissuarmik tiguaanerup aserorterpaa, Musharraf oqarpoq.
- Naamik, Musharrafiuna nunami eqqissisimatitsinngitsoq, taamaammat tunuartariaqarpoq, Nawas Sharif, Pakistanimi ministeriunerusimasoq Londonimi ataatsimeersuartuni oqarpoq.
