Pakistanimi ippassaq qaartartumeerisoqarmat inuit 43-t toqutaapput
Arnaq Pakistanip kimmut avannarpasinnerusortaani Kharimi imminut toqoriaatigaluni ippassaq qaartartumeerimmat inuit 43-t toqutaapput, 60-illu missaat ikilerneqarlutik. Naalagaaffiit Peqatigiit ikiuiniarnermut atugassanut toqqorsiaviata silataani saassussisoqarpoq.
Allattoq Mads Lynge
decembarip 26-at 2010 17:42
Pakistanimi talibanit qaartartumeerinermut akisussaasuunerarput. Sunnimuslimit tunuliaqutaralugit qunutitsillutik saassussisaqattaartartut Al-Qaedameersut, nunap immikkoortuani Bajaurimi takussaapput, arnarlu qaartartumeerisoq taakkunaninngaanneersuusimanersoq misissorneqaleruttorpoq.
Nutaarsiassaqartitsivik AFP taama allaaserisaqarpoq.
USA-p præsidentiata Barack Obamap ilaquttani ilagalugit Hawaii-imi maanna juullisiortup, Pakistanimi qaartartumeerineq assuaraa:
- FN-ip pigisaata silataani inunnik toqoraaneq Pakistanip innuttaasuinik nunarsuarmioqatigiinnullu asissuineruvoq. Pakistanimi innuttaasut USA-mit misiginneqatigaavut, Obama oqarpoq.
