Pakistanimi inatsisartut pissaaneqarnerulerput

Inatsit nutarterinermi atorneqartussaq, pissaanermik præsidentimiit inatsisartunut nuussisussaq, Pakistanimi inatsisartut tamarmiusut ullumi akuersissutigaat. Sakkutuut ukiorpassuarni aqutsisuusimanerisa kingorna inatsisartut pissaaneqarnerulersikkumallugit tamanna pivoq.
apriilip 08-at 2010 16:21

Taasinermut atatillugu inatsisartut nuannattorsuupput. Pervez Musharrafip 1999-imi sakkutuut atorlugit mumisitsinera unioqqutitsinerusoq aamma sakkutuut kisermaassineranni naalagaasimasup Mohammad Zia-ul-Haq-ip aqqata nunami inatsimmit peerneqarnissaa pillugu inatsisissaq taasissutigineqarmat, naalakkersuinikkut suliallit arlaqaqisut sakkutuut siuttorinikuusaannut akerliuniarlutik erinarsuataarrapput.

Nunami inatsisitigut allannguuteqartitsinikkut Pakistanimi naalakkersuinikkut suliaqartut akornanni aaqqiagiinnginnerit minnerulernerannik sunniuteqarsinnaavoq.

Præsident Asif Ali Zardari, ministeriunermik soraarsitsisinnaajunnaarpoq, inatsisartunik tunuartitsisinnaajunnaarluni aamma Pakistanimi sakkutuut pissaaneqaqisut siuttussaannik toqqaasinnaajunnaarluni.

Inatsimmi allannguutit "nutarterinertut aalajangiisuusutut" Pakistanip maanna præsidentiata Zardari-p aamma tapersersorpai, siunissamilu nammineq nuna sinnerlugu saqqummersartutut atuunnerulersussaavoq.

Pakistanimi inatsisartut qaffasinnerit inatsit sapaatip akunnerani tullermi taasissutigissavaat, taakkunanilu amerlanerussuteqarluartut akuersissutigissagaat naatsorsuutigineqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq