Pakistanimi akerliuniartut politiinit saassunneqarput

Pakistanimi eqqartuussissuserisunut akerliussutsimik takutitsisunut, præsident Pervez Musharraf-ip sukannersumik naalakkersuisoqarnissaanik atuutsitsilerneranut akerliusut ullumi politiinit saassunneqarput, aamma oqartussaasut, naak nunanit tamalaanit isornartorsiorneqaraluaqalutik illuatungiliuttunik tigusaqartuarsinnarput.

Musharraf-ip, suli sakkutuunut naalagaasup, arfininngormat sukannersumik naalakkersuilernissaq eqquppaa, taamaaliornermini innersuussutigalugu ”peqqarniisaarniat sakkulersorsimasut ingatsikkaluttuinnarnerat” aamma eqqartuussisut akerliunialeraluttuinnarnerat. Taassuma erseqqissarpaa, akerliussutsimik takutitsisut imaluunniit oqartussaasunut akerliuniartut sakkortuumik pineqartassammata. Eqqartuussissuserisut 30-t missaanniittut tigusarineqarsimapput politiinillu sakkortuumik pineqarsimallutik, taamaattorli ullup unnuallu tulliuttup ingerlanerani illoqarfinni annerusuni eqqartuussiviit eqqaanni akerliussutsimik takutitsisoqartarnissaa ilimagineqarpoq.

Pakistanimi januaarimi inatsisartunut qinersinissap pilersaarutigineqartup piviusunngornissaa nalornissutigineqalerpoq ministerillu ilaat ullumikkut oqaaseqarpoq, Musharrafip sakkutuut naalagaattut tunuarnissaminik neriorsuutaa qaqugu pissanersoq nalorninarsisoq.