Pakistanimi ajunaarnersuaqarnerani Kalaallit Røde Korsiat katersinialerpoq
Pakistanimi nunap sajorujussuarnerata kingunerisaanik nunatsinnit eqqugaasunut katersuiniarneq nuna tamakkerlugu suli aallartinngitsorli, Kalaallit Røde Korsiat inunnik arlalinnik sianerfigitittarpoq, nunap sajorujussuarnerani eqqugaasunut ikiuerusullutik aningaasanik ikisiffissaqarnerlutik paasiniaasunik. Ajunaarnersuup annertussusia suli naammatsillugu paasineqanngikkaluartoq, nunatsinnit ikiuisoqarnissaa pisariaqarluinnartoq, Kalaallit Røde Korsiani siulittaasoq Marianne Jensen oqarpoq.
-Pakistanimi oktoberip arfineq pingajuanni sajunnersuup kinguneranik ajunaarnersuaqarpoq, taannalu ajunaarnersuaq ima sakkortutigivoq, allaat Danmarikimi Røde Korsip ukiorpassuarni sulinermini aatsaat taama suliniuteqarnera peqataaneralu annertutigisutut oqaatigineqarsinnaavoq, Marianne Jensen oqarpoq.
Taamaakkaluartoq pisariaqartitsineq annertoorujussuusoq Marianne Jensenip oqaatigaa, maannamut toqusimasut 50.000-it sinnereernikuummatigit allatullu eqqugaasimasut 4 millionit sinnereersimammatigit.
-Eqqugaanikut allat suli aamma tikinneqarsinnaasimanngillat, massakkullu aamma Pakistanimi ukioriartulerpoq taassumalu kingunerisaanik inuit 400.000-t missaanniittut ukiup sakkortuallaalersinnagu oqquiffigisinnaasaannik pilersortariaqarput, Marianne Jensen oqarpoq.
Tamanna anguneqarsinnaavoq toqqinik, tippinik allanillu oqorsaatigisinnaasaannik pajuttorneqarnermikkut, taamaaliunngikkaanni inuppassuit qiullutik toqusinnaanerat aarleqqutigineqarpoq. Suligassuarnissaq, ikiuunnissaq allatigullu nakorsaatitigut ikiuinissaq annertoorujussuarmik pisariaqartoq Marianne Jensenip ilanngullugu oqaatigaa, neriuutigalugulu inuit nunatsinninngaanneersut aamma katersuiniarnermut peqataalluarumaartut.
Marianne Jensen-ip ilanngullugu oqaatigaa nunatsinnit ikiuisoqarsinnaasoq aningaasanik tapersersuinikkut, aningaasat katersukkat Dansk Røde Korsimut ingerlateqqinneqassallutik.
-Danmarkimi Røde Korsi uani suliami annertoorujussuarmik siuttuuvoq, siulliullutik aamma ajunaarfimmut apuuttuupput. Massakkut aamma annertuumik aqutsisutut ataqatigiissaarisutullu ikiuiniarnermi atorneqarput, taamaammat qularinngilarput Dansk Røde Korsip sumi annertunerpaamik atorfissaqartitsisoqarnersoq ilisimaarilluaraa, aningaasallu tuffissaanut pitsaanerpaamut atorluarniarumaaraa qularutiginngilarput, Marianne Jensen oqarpoq.
Asiami siorna juullikkunni ulussaarsuartoqarmat nunatsinnit kingullermik katersisoqarpoq, taamani aningaasat 4,6 millioni koruunit katersorneqarlutik. Marianne Jensen-ip neriuutigaa massakkut aamma inuit katersinissamut piumassuseqarumaartut, aaqqissuussisoqarusuttoqassappallu Kalaallit Røde Korsiannut saaffiginninnissamut tikilluaqqusaasut.
Pakistanimi ajunaarnermut ikiuerusuttoqaruni Grønlandsbankimut aningaasanik ikisisoqarsinnaavoq, uunga: registrerings normu 6471 konto normulu 8008008.
Marlunngorpat inatsisartunut qinersisoqarnerani taasiffiusuni Kalaallit Røde Korsiat namminneq piumassutsiminnik ikiortilerlutik katersuiniassapput, illoqarfinni makkuani: Ilulissani, Sisimiuni, Maniitsumi, Nuummi Qaqortumilu.
