Paggivittami Nunaviullu avannaata kangiani tuttut aarlerinartumik ikiliartorput
Ukiut sisamaannaat matuma siornagut - 2010-mi - tuttunik kisitsisoqarmat Nunaviup Paggivittallu killeqarfianni tuttut 74.000-iunerarneqarput, taakkuninngalu piniagaqartut tassaallutik indianerit Creet aamma Naskapit kiisalu naggueqatigiit Inuit.
Tuttut tamaaniittut 1980-ikkunni 700.000-it aamma 800.000-it akornanniipput... taamanilu taakku nunarsuarmi tuttoqatigiit amerlanersaasa ilaattut taaneqarlutik.
Uumasunik nujuartanik uumassusilerisup Steve Cotép, Laval Universitetimeersup CBC News-imut oqaatigaa, tuttut aarlerinartumik ikiliartornerannut suut patsisaanersut ilisimaqqissaarneqanngitsoq, taamaattorli patsisaasut arlaqassangatinnartut.
- Piaqqat suli allivallaartinnatik toqusarput imaluunniit kiisortunit nerineqartarlutik, aamma naammattunik inuussutissaqanngillat aamma tuttoqatigiit akornanni nappaalasoqartorujussuuvoq, uumassusilerisoq oqarpoq.
Tuttoqatigiit ikilerujussuarnerisa kingunerinik piniarnermi malittarisassanik sukaterisoqarpoq.
Taamaallaat indianerit Creet aamma Naskapit kiisalu naggueqatigiit Inuit killilimmik piniarnissamut akuerineqarsinnaapput, tamatumalu saniatigut tuttunik pisaqarsinnaaneq ukiuni tallimani inerteqqutigineqalerluni, taamaaliornikkut tuttoqatigiit annaanneqarsinnaannissaat neriuutigineqartoq, CBC News ilisimatitsivoq.
