Paavip allakkat uppernarsaatit nassiuppai
Allakkat Irlandimi uppertunut ingerlatinneqarput. Nunami tassani katuuleqarfissuarmi naalagaaffimmit misissuisussatut ataatsimiititaliami palasit pissuserissaarnissamullu ilaasortat allat ukiut qulikkuutaat amerlaqisut ingerlaneranni meeqqanik kinguaassiuutitigut atornerluisarsimaneri nalunaarsorneqarsimapput, tamatumanilu ilagiinni oqartussaasut akuliussimannginnerat uppernarsarneqarluni.
Allakkat Irlandimi ilagiinnut ingerlatinneqarput, tamanilli ilimagineqarluni Paavi nunani allani mamianartulianut aammattaaq attuumassuteqartoq, ingammik Tysklandimi, paasineqartut januaarimili imaaginnalerfianni. Paavi nammineq, Joseph Ratzingerimik ateqarluni, 1982 tikillugu Münchenimi biskoppiuneruvoq taamaalillunilu inuttut toqqaannartumik akuulluni.
Tarnip pissusaanik ilisimasalik, 1980-imi palasimik atornerluisimasumik katsorsaasimasoq ullumi oqarpoq palasi taanna ukiukitsunik sullitaqaqqinnginnissaa pillugu nammineq allakkatigut oqaasiinnarmillu mianersoqqusisarsimanini biskoppiuneqarfiup ilaginnarsimagai. Ukiut sisamat qaangiummata palasi taanna atornerlueqqippoq.
Palasip pineqartup katsorsartikkiartornissaa Ratzingerip akuersissutigisimavaa, Ratzingerilli tarnip pissusaanik ilisimasallip mianersoqqussutai aammalu palasip sulilerseqqinneqarnera ilisimanerai biskoppiunerup allaffianit nassuiarneqarsimanatik.
Katuullit biskoppiisa Bayernimiittut ukiukitsunik kinguaassiuutitigut atornerluisoqarneranik pasitsaassaqartoqarniariaraangat unnerluutiginnittarnissamik pisussaaffeqalernissap atulersinneqarnissaa maanna kajumissaarutigaat.
Ilagiit malittarisassaanni oqartussaasunut unnerluutiginnittarnissaq piumasaqaataanngilaq, Bayernimili biskoppit konservativitoqqat tamarmiullutik Tysklandimi ilagiit katuuliusut tamaasa ilagiit namminneerlutik ajornartorsiummik aaqqiiniartarnissaannik takorluuijunnaaqqullugit kajumissaarpaat, DR taama nutaarsiassaqartitsivoq.
