Paaviaaraq Heilmann: Naalakkersuisut pasillerput
Royal Greenland Naalakkersuisunit Piniarnermut Aalisarnermullu Pisortaqarfimmit eqqunngitsumik pineqarpoq, Paaviaaraq Heilmann Royal Greenlandip siulersuisuini siulittaasoq sakkortuumik taama isorinnippoq. Paaviaaraq Heilmann isumaqarpoq Royal Greenland raajanut tapiissutinik agguaassisarnermut atatillugu isumaginninnilliorsimasutut naalakkersuisunit pasillerneqartoq. Paaviaaraq Heilman ima oqarpoq:
- Allagaqarpugut Naalakkersuisut siulittaasuannut, sakkortuumik akissuteqarluata, tassami pasillerneqaratta raajanut tapiissutit 2004-mut tunngasut pillugit piaaraluneerluta imaluunniit kukkorujussuarluta kisitsisinik Aalisarnermut Piniarnermullu Pisortaqarfimmut nalunaaruteqarsimasugut.
Royal Greenlandip marsimi allgaani ersarissumik nalunaarutigineqarsimavoq kisitsisaagallartut nassiunneqartut. Tamatuma kingorna septembarip aallaqqaataani kisitsisit eqqortut nassiunneqarsimasut Paaviaaraq Heilmann oqarpoq.
- Taamaakkaluartorli Naalakkersuisut septembarip 22-ianni allapput piaaraluneerluta imaluunniit mianersuaalliorluta tapiissutinik isumaginnissimanerarluta.
- Tamanna ilumuunngilaq, tassa kukkunersiuisoq Namminersornerullutillu Oqartussat kukkunersiuisuat nalunaaruteqarput Royal Greenlandip kisitsisaatai kingulliit eqqortuusut.
Paaviaaraq Heilmann oqarpoq kisitsisaagallartut tunngavigalugit taama sakkortutigisumik pineqarnertik, allaallu avammut saqqummiussuisoqarluni, aaqqiiffigineqartariaqartoq. Aamma Naalakkersuisut akissuteqarumaarnissaat naatsorsuutigilluinnarnerarpaa.
Naalakkersuisuugallartut siulittaasuat Hans Enoksen Aalisarnermut aamma Naalakkersuisuusoq oqaaseqarumanngikkallarpoq, raajanut tapiissutinut atatillugu kisitsisaatigineqartut assigiinngitsuunerannik Nammminersornerullutik Oqartussani Royal Greenlandimilu atorfillit suli misissuisinneqarmata. Erseqqissaatigaa Namminersornerullutik Oqartussani kukkusoqarsimassappat soorunami naqqiisoqarumaartoq.
