Paavi utoqqatsertariaqarpoq
Upperisamut islamimut paavi qanoq eqqarsaateqarnersoq muuamaamik upperisalinnut kamaqisunut mianersortumik silatusaartumillu paavip najugaani nassuiarniarneqarpoq.
Muuamaamilli upperisallit nunarsuatsinni tamaniittut kamannertik ”eqqissisimasumik” ullumikkut atoqqullugu islamimik upperisallit palasiata nuimasup, Yusuf al-Qaradawip, ilutigalugu siunnersorpai.
Paavip Benedikt 16-ata Tysklandimi sapaatip akunnerani kingullermi oqalugiareerlunilu upperisaq islam pannallu atorneqartarnera pillugu oqaaseqarnerminut atatillugu ajuusaarnera naalagarsuup Yusuf al-Qaradawip, naammaginartinngilaa.
Qaradawi, islamimik upperisallit palasiini nuimanerpaat ilaattut naatsorsuunneqartartoq, islamimik upperisallit internetikkut aviisiat, IslamOnline, naapertorlugu oqarnerarneqarpoq, paavip ajuusaarluni oqarnera naammanngitsoq, utoqqatsinerunngimmammigooq.
- Muuamaamik upperisallit kamannertik eqqissisimasumik eqqarsaatigilluakkamillu uani qaammammi tallimanngornermi kingullermi, Shabanimi, takutinniarlissuk, Qaradawi oqarpoq, ilutigalugulu ajuusaarutigaa, paavimut akerliunermi kristumiut illernartitaat ulluni kingullerni taama innarlerneqarmatalusooq.
