Paavi Benedikt inuulluaqqusivoq
Ilagiit katuullit siuttuat, Paavi Benedikt, sioqqutsilluni tunuarniarluni nalunaaruteqarpoq. Italiamiut nutaarsiassaqartitsiviat Ansa taama nalunaaruteqarpoq.
Allattoq Karsten Sommer, Simon Uldum
Paavip februaarip 28-iani tunuarniarluni nammineerluni latinerisut nalunaarutigaa.
Paavi, Tysklandimi inunngortoq, ilagiit katuullit siuttuattut 2005-imi ivertinneqarpoq. Paavi Johannes Paul II ukioq taanna toqusoq taamani taarserpaa.
Vatikani naapertorlugu, paavi ilagiinnut siuttuunissaminut utoqqaavallaalersimasutut misigisimalersimavoq.
Paavimik nutaamik toqqaanissaq sivisuupilussuusinnaavoq. Kardinalit nunarsuarmit tamarmeersut Vatikanimi katersuullutik kina taartaassanersoq isumaqatigiinniutigissavaat.