Paavi BBC-mit avoqqaarineqarpoq

Tuluit tv-qarfiat BBC ippassaq aallakaatitami paavimut Benedikt XVI – 16-iannut sakkortuumik avoqqaarinnippoq. Aallakaatitassiami ilaatigut katuullit palasiisa meeqqanik kinguaassiuutitigut atornerluisarnerannik paasineqatsaaleeqataasimasutut oqaatigineqarpoq.

Paavi ukiuni 20-ni maleruaqqusaliamik atortuutitsisimavoq, maleruaqqusaliarlu isertuussaq taanna 1962-imeersoq, katuullit biskoppiisa meeqqanik atornerluisarnerannut suliat tunngasut allanut isertuulluinnarneqarnissaannik imaqarneragaavoq.

Allakkiaq latinerisuumit tuluttuunngorlugu fader Tom Doyle-imit nutserneqarsimavoq, taannalu paavip naalagaaffianit Vatikane-mit siornatigut soraarsitaanikuuvoq, ilimagineqarporlu paavip, meeqqat atornerlunneqarsimasut pillugit nipangiussisarneranik uparuaasarnini pillugu tunuartitaasimasoq.

BBC-mi aallakaatitaq naareersorlu, Tuluit Nunaanni Ilagiit Katuullit Oqaluffiat nalunaarpoq, allakkiaq kukkulluinnarlugu paasineqarsimasoq, meeqqanik atornerluisarnermut tunngasuunani, issiaviulli anngiiartarfiup atornerlunneqartarneranut tunngassuteqartoq unnerlugu.

- Kukkuneruvoq, Vatikanimi allakkiat marluk paasinerlunneqarsimapput, taamaasilluni paavi akuersornanngilluinnartumik meeqqanik atornerluisarnermut taputartuunneqarluni, Vincent Nichols Birminghamimi ærkebiskoppiusoq oqarpoq.