Paavi aalassatsitsivoq

Paavip Benedikt 16-ata muuamaamik upperisallit aalassatippai.

Paavi Tysklandimi Regensburgip universitetiani sapaatip-akunnerani uani oqalugiarpoq. oqalugiaammini kejseri naaggaartuusoq 1400-kkunni inuusoq issuarlugu ima oqaaseqarpoq: Muuamaat ajortuliornermik naakkittaannermillu nunarsuarmi misigititsisarnerarlugu.

Paavip taamatut oqarnera ullumikkut muuamaamik upperisalinnik isornartorsiuinerunngitsoq Vatikanimit erseqqissaasoqaraluartoq muuamaamik upperisallit aalassatsinneqaqaat.

Pakistanimi inatsisartut Paavip oqaasiisa utertinneqarnissaat kajumissaarutigaat. Pakistanimi nunanut allanut ministereqarfiup Paavi ilisimasaqarpianngitsutut isigaat.

Paavip oqaasii Indonisiami sakkortuumik qisuariaatigineqarput, Tyrkiamilu muuamaamik upperisalik ilisimaneqarluartoq oqarpoq Paavip Tyrkiamut ukioq manna tikeraarnissaminik pilersaaruteqarnini eqqarsaatigilluaqqittariaqaraa.

Paavi Benedikt siullerpaamik Tyrkiamut tikeraassaguni muuamaamik upperisallit tikeraartussaavai.