Paatsuugaqarsimagunartoq Espersenip ernummatigaa
- Uuliamit Kalaallit Nunaanneersumik aningaasat isertitaajumaartussat Danmarkip Kalaallit Nunaatalu akornanni assigiimmik aveqqissaarneqartassapput, ministeriuneq Anders Fogh Rasmussen ippassaq oqarpoq, Namminersornerli pillugu Isumalioqatigiissitami ilaasortat amerlanerussuteqartut killiffiat ministeriunerup atuarsimagunanngilaa paasisimagunarnagulu, Søren Espersen isummersorpoq.
Søren Espersen Namminersorneq pillugu Isumalioqatigiissitami ilaasortaavoq, kisiannili ikinnerussuteqarluni. Isumalioqatigiissitami ilaasortat amerlanerussuteqartut isumaqatigiissutigeqqammerpaat, aningaasat ukiumoortumik ataatsimoortumik Danmarkimiit tapiissutit 3 milliardi koruuninit annertunerulaartut ilanngaatigereerlugit aningaasat isertitassat tamarmik Kalaallit Nunaannut tuttassasut, tassa Søren Espersenip isumaata killormorluinnaanik. Ministeriunerli killormorluinnaq oqarpoq, Espersen tikkuaavoq.
