Naalakkersuisup Karla frederik Danielsenip nassuianngilaa isumaqatigiissut aningaasaqarnermut tunngasumik ataasinnguamilluunniit allassimasortaqanngitsoq Namminersorlutik Oqartussanit sooq atsiorneqarsimanersoq.Assi: KNR

Paatsiveerutsitseqaaq: Angerpoq – naaggaarniarsimagaluarlunili

- Apeqqutinnut angernera qularinngiivikkakku akissutiga pillugu tusagassiuutitigut naatsumik nalunaaruteqarnikkut naqqiuteqartariaqarsorisimavunga, Karl Frederik Danielsen KNR-imut taama oqarpoq.

Karl Frederik Danielsenip, Ane Lone Baggerip Danmarkillu illersornissamut ministeriata skypekkut peqataasup Nunatta Danmarkillu Kangerlussuarmi mittarfiup siunissaa pillugu isumaqatigiissutaat Naalakkersuisut tusagassiortunik katersortitsisarfianni atsiorpaat.

Mittarfik atuutiinnassaaq. Danmarkip illersornissaqarfia innuttaasullumi atuisuuinnarsinnaassapput, illuatungeriit isumaqatigiissummik atsioqataasut taama oqarput.

AAMMA ATUARUK Kangerlussuaq pillugu tunngaviusumik isumaqatigiissut: Kangerlussuarmi mittarfiup iluarsaannissaa Illersornissaqarfiup akilissavaa

Kangerlussuarmi mittarfiup aserfallatsaalineqartarnissaanut aningaasartuutitigut sipaaruteqarfigisarnissaa qulakkeerumallugu millilerneqarnissaa pilersaarutaagarluarpoq. Sipaarutit Nuummi, Ilulissani Qaqortumilu mittarfissualiornissanut aningaasartuutinut matussutissat ilagisussaassagaluarpaat.

Taamaattumik isumaqatigiissut nutaaq atsiorneqaqqammertoq mittarfissuassat 2023-mi ammareerpata Kangerlussuarmi mittarfiup iluarsaanneqarneranut, aserfallatsaalineqarneranut ingerlanneqarneranullu aningaasartuutit kikkunnit akilerneqartassanerat pingaarnertut apeqqutigineqarneranik kinguneqarpoq.

Naalakkersuisut tamatumunnga tunngatillugu nalunaarutaat ersarippoq:

- Erseqqissaatigissavara Illersornissaqarfik aserfallatsaalineqarneranut ulluinnarnilu ingerlanneqarneranullu akiliisassammat, attaveqatigiinnermut naalakkersuisoq Karl Frederik Danielsen tusagassiortunik katersortitsinermi taama oqarpoq.

Illersornissaqarfiulli akiliisartussaanera isumaqatigiissummi sumiluunniit allassimanngilaq. Taamaammat KNR-imit Karl Frederik Danielsenimut tusagassiortunik katersitsisoqareersoq arlaleriarluta apeqqutigaarput Illersornissaqarfiup akiliisarnissaa Naalakkersuisunit qanoq ililluni qulakkeerneqarsinnaanersoq.

AAMMA ATUARUK Illersornissaqarfik Kangerlussuup ingerlanneranut akiliisussaasoq

Akissuteqarnermini paaseqatigiissimanerarput, aamma oqaatigaa tamanna siunissami nassuissiumaartoq.

Taamaattumik KNR-imit aperivarput isumaqatigiissummik Illersornissaqarfiup akiliisarnissaanut tunngasumik sulili tamanut saqqummiunneqanngitsumik atsioqatigiissimanersut. Tamatumanilu apeqqutitsinnut akissutaa ersarilluinnarpoq: Aap.

Angeriarluni naaggaartoq

Erseqqissumilli angersimagaluarnini tamatuma kingorna naaggaarninngortippaa.

- Apeqqutinnut angernera qularinngiivikkakku akissutiga pillugu tusagassiuutitigut naatsumik nalunaaruteqarnikkut naqqiuteqartariaqarsorisimavunga. Isumaqatigiissummik isertuussamik atsioriikkamik peqanngilaq, Karl Frederik Danielsen allakkatigut taama akissuteqarpoq.

Attaveqatigiinnermut naalakkersuisup nunarput Danmarkillu Illersornissaqarfiup akiliisarnissaanut paaseqatigiissimaneraqqippai, nassuianngilaali tamanna Namminersorlutik Oqartussanit qanoq qulakkiivinneqarsinnaanersoq aamma sooq isumaqatigiissut aningaasaqarnermut tunngasumik ataasinnguamilluunniit allassimasortaqanngitsoq atsiorsimaneraat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat