Paasiuminarnerusumik paasissutissiisarnissaq ujartorpaa
Quppernerit 20-it. Tassa Naaja Nathanielsenip, Olga P. Berthelsenip aamma Juliane Henningsenip §37 naapertorlugu apeqquteqaataanut Naalakkersuisut akissutaat taama qupperneqartigaaq.
Akissutigineqartut Naaja Nathanielsenip iluarisimaarpai, erseqqissaatigaluguli suli eqqarsarnartortaqartut. Naalakkersuisulli paasissutissiiginnartassanngitsut - paasinartuliortassasulli Naaja Nathanielsen isumaqarpoq.
- Innuttaasut paasissutissanik tuluttuunik ulloq unnuarlu atuarnissaat naatsorsuutigineqarsinnaanngilaq. Ilumoorpoq paasissutissat nittartakkatigut pissarsiarineqarsinnaammata, tamannali piffissartornartuuvoq aamma ilisimasanik tunuliaqutaasunik ilisimasaqarnissaq, minnerunngitsumillu tuluttoorluarsinnaanissaq pisariaqarluni. Kisianni Innuttaasut oqaatsit paasiuminarsakkat, kalaallit qallunaallu oqaasii, atorlugit paasissutissanik pissarsisinnaanissaat pingaaruteqarluinnarpoq. Taamaattumik apeqqutikka akissuteqaatillu tunngavigalugit oqallinneq ersarinnerulersimasoq isumaqarpunga, Naaja Nathanielsen oqarpoq.
Aatsitassaqarnermut Naalakkersuisup Ove Karl Berthelsenip apeqqutigineqartut iluarisimaarpai:
- Ersarinnerusumik akissuteqarnissamik periarfissinneqarnera iluarisimaarpara, Ove Karl Berthelsen oqarpoq.
Uuliasiornerup ingerlanera sillimaniarnerlu pillugit TV-kkut piviusulersaarutinik marlunnik pilersaarusiortoqartoq Ove Karl Berthelsenip ilannugllugu oqaatigaa.