Paasititsiniaanermi namminersorneq pineqarpallaanngilaq

Uummannami ippassaq unnukkut Namminersorneq pillugu paasititsiniaasoqarmat taamaallaat 60-t missaat takkupput. Ataatsimiinnermi paasititsiniaanertut taaneqartumi, namminersorneq anginerusumik pineqarani sumiiffimmi ajornartorsiutaalersimasut, naalakkersuinikkullu kukkussutaasarsimasut oqaluuserineqarput.
septembarip 08-at 2008 14:59

Uummannami ippassaq unnukkut Namminersorneq pillugu paasititsiniaasoqarmat taamaallaat 60-t missaat takkupput. Ataatsimiinnermi paasititsiniaanertut taaneqartumi, namminersorneq anginerusumik pineqarani sumiiffimmi ajornartorsiutaalersimasut, naalakkersuinikkullu kukkussutaasarsimasut oqaluuserineqarput. – Taamaattumik paasititsiniaaniaraluit qineqqusaarujussuaannarput qaleriaarlutillu assamminnik errortuillutik, taama oqarpoq Uummannami borgmesteriusimasoq Ulloriaq Løvstrøm nangipporlu: Hans Enoksenip Kuupik Kleistillu ilaatigut nassuerutigaat assigiimmik akeqarunnaarsitsineq torrallataavallaanngitsoq sualummillu Uummannap umiarsuarmilluunniit tikinneqassaarsimanera. Ulloriaq Løvstrøm isumaqarpoq namminersulernissamut taasititsiniarneq kinguartiallanneqartariaqartoq apeqquterpassuit massakkut akissutissaqartinneqanngitsut imaaginnavimmata. – 1979-mi namminersorneruleratta avataaniit sulisussagut aavagut namminerlu ineriartornermut isiginnaartuinnanngorluta. Atorfillit avataaneersut oqaasissaqartitaanerat sakkortoorujussuuvoq, namminersuleruttalu isiginnaartuinnanngoqqissanngikkutta kalaallinik piginnaanngorsaallutalu ilinniartitseqqaarniarta, Ulloriaq Løvstrøm oqarpoq. Uummannami namminersorneq pillugu ataatsimiititsinermi ikittuinnaat ornigunnerannut ukiorpassuarni Uummannarmiut inatsisartuni naalakkersuisunilu ilaasortanit tusaajumaneqartarsimannginnerat Ulloriaq Løvstrømip pissutaatippaa. – Inuit soqutigisaarukkiartornikuupput ungasinganiit aqutsineq qattukkamikku, Ulloriaq Løvstrøm namminersornermut naaggaarani kinguartitsigallaqqusisoq oqarpoq.