Paasititsiniaanerit kalaallisut oqaasilinnut saaffiginninngillat
Alcoa pillugu nalunaarusiat kalaallisuunngortinneqarsimannginneri Nuummi innuttaasut ilaata Piitannguaq Tittussenip akuersaarsinnaanngilaa.
- Nalunaarusiaq ukiup affaanik kingusinaarluni takkuttoq qallunaatuinnaq saqqummersinneqarpoq, aqaguanilu ingerlaannaq Nuummi innuttaasunik ataatsimiititsisoqarpoq. Nalunaarusiaq taama pingaaruteqartigisoq atorfiliinnarnut saaffiginnittarianngilaq, innuttaasunut tamanut aallaqqaataaniilli saaffiginnittariaqarpoq, aamma kalaallisut oqaasilinnut, taama Piitannguaq Tittussen Qanoruumut oqarpoq.
Greenland Developmentimi paasissutissiinermi siunnersorti Ellen Christoffersen, nassuerpoq aluminiumik aatsitsiviliorfissap inuiaqatigiit aningaasarsiornerannut qanoq sunniuteqarsinnaanera pillugu nalunaarusiaasoq suli kalaallisut nutserneqanngitsoq, aamma taamaappoq nalunaarusiaq alla innuttaasut isumaat nalunngisaallu pillugit nalunaarusiaasoq. Sapaatilli akunnerata tulliani nutserneqarumaartut Ellen Christoffersen neriorsuivoq.
Piitannguaq Tittussenip suliniummi qullersaqarfik attavigisimavaa paasitinneqarsimallunilu nalunaarusiat marsip aallaqqaataani kalaallisut nutserneqalissasut.
- Apeqqut taama pingaaruteqartigisoq ataatsimiilinnginnermi kalaallisut aamma saqqummiunneqarsimasariaqaraluarpoq, Piitannguaq Tittussen oqarpoq.
