Paasititsiniaaneq annikippallaarpoq
Politiit kisitsisaatai malillugit, nunatsinni meeqqanik atornerluinerit Danmarkimut sanilliullugit quleriaammik amerlanerupput.
Taamaakkaluartoq Namminersornerullutik Oqartussat meeqqanik atornerluisoqarsimatillugu ilaqutariit eqqorneqartut, qanoq iliornissaannik paasititsiniaasarnerat annikippallaarujussuartoq, Ilaqutariinnermi Pisortaqarfimmi tarnip pissusaanik ilisimasalik Jonna Ketwa oqarpoq.
-Pingaarnerpaavoq angajoqqaat ilisimassallugu meeqqamik atornerlunneqarsimanissaanik pasitsaataqarunik qanoq iliornissaat. Tassa kommunimut politiinut imaluunniit napparsimavimmut saffiginnissallutik. Eqqorneqartuulluni sumut saaffiginninnissaq nalunartorujussuusinnaavoq. Aamma pingaaruteqarpoq ilisimassallugu atornerluinerit qanoq aallartissinnaasartut, Jonna Ketwa oqarpoq.
Jonna Ketwap meeqqanik atornerluinerit kisitsisitigut takussutissaqarnissaat ajornakusoortoq nalunngikkaluarlugu suli annertunerusumik kisitsisitigut takussutissaqartalernissaanik ujartuivoq. Massakkutut isikkoqartillugu takuneqarsinnaanngilaq meeqqanik atornerluinerit amerliartornersut imaluunniit ikiliartornersut, ikiliartorsimanissaalli ilimaginngilaa.
Meeqqat 17-it 2003-mi atornerlunneqarsimanerup kingunerisaanik ulloq unnuarlu angerlarsimaffinnut inissinneqarput.
Atornerlunneqarsimasut atornerluisunngorsinnaasarput, amerlasuullu imminoornissaminnik eqqarsaateqartarput.
