Paasitinneqarsinnaatitaanermut inatsit Folketingimi nalilersuiffigineqalersoq

Pisortat ingerlatsinerat pillugu paasitinneqarsinnaatitaaneq pillugu danskit inatsisaata Nunatsinnut tunngasuni atuuttussanngortinneqannginnerani Folketingimit nalilersuiffigineqarnerata naammassineqarnissaa danskit naalakkersuisuisa Naalakkersuisullu utaqqeqqaarniarpaat.
Assi © : KNR
septembarip 14-at 2017 11:20
Nutserisoq Simon Uldum -

Naalakkersuisut siulittaasuata naalakkersuisoqarfia KNR-imut taama ilisimatitsivoq.

Naalakkersuisut akunnerminni aamma Namminersorlutik Oqartussat danskillu naalakkersuisuisa akunnerminni ukioq ataaseq assortuunnerat taamaalilluni unitsikkallarneqarpoq.

AAMMA ATUARUK Danmarkimi inatsit danskit nunatsinni oqartussaasuinut atuutsikkusukkaat

Suliaq siorna ukiakkut aallartippoq, Naalakkersuisut danskit naalakkersuisui sinnerlugit pisortat ingerlatsinerat pillugu paasitinneqarsinnaatitaaneq pillugu danskit inatsisaata 2013-imeersup Danmarkip Nunatsinni oqartussaaffigisaanut atuuttussanngortinneqarnissaanik inatsisissatut siunnersuummik saqqummiussaqarmata.

Inatsit Danmarkimi isornartorsiorneqangaatsiarpoq, ilaatigut oqartussat sulinerat, pingaartumik ministerikkoortumik suliani, ingerlatsineq pillugu innuttaasut paasitinneqarsinnaatitaanerat ajornarnerulersinneqarmat. Siunnersuut aamma nunatsinni tusagassiuutinit, kattuffinnit partiinillu arlalinnik isornartorsiorneqarpoq.

AAMMA ATUARUK Danskit inatsisaata nunatsinni atuutilersinnissaa isumakulunnartoqartikkaat

Siunnersuutip Namminersorlutik Oqartussanit danskillu naalakkersuisuinit nunatsinni tamanut tusarniaassutigineqarsimannginnera paasineqarmat, Naalakkersuisut siulittaasuata Kim Kielsenip siunnersuut Inatsisartut ukiakkut ataatsimiinneranni tunuartippaa.

Inatsisartullu upernaakkut ataatsimiimmata oqaluuserisassanit kingumut peerneqarpoq, kalaallisuunngortillugu nutserneqarnerata amigaateqarnera nassuiaatigineqarluni.

Inuit Ataqatigiit siunnersuutip tunuartinneqarnissaanik piumasaqaateqarnerisa peqatigisaanik tamanna pivoq.

AAMMA ATUARUK Danskit inatsisaata atuutilersinneqarnissaa nunatsinni tusarniaassutigineqanngitsoq

AAMMA ATUARUK Kielsenip inatsisissatut siunnersuut tunuartikkaa

Tamannalu aamma iluatsippoq - maannamuugallartoq. Danskimmi inatsisinik atuutsitsinermut ministeriat, Søren Pape Poulsen, inatsisip allanngortinneqarnissaa kissaatigalugu nalunaaruteqarpoq. Siunnersuutillu Inatsisartuni saqqummiuteqqinneqannginnerani inatsit  Folketingimi maanna nalilersuiffigineqartussanngorpoq, Naalakkersuisut siulittaasuata naalakkersuisoqarfia taama ilisimatitsivoq.

AAMMA ATUARUK Paasitinneqarsinnaatitaaneq pillugu inatsisissatut siunnersuut Kielsenip tunuarteqqikkaa

AAMMA ATUARUK Danskit inatsisaata eqqunniarneqarnera GE-p isornartorsioraa

AAMMA ATUARUK Paasitinneqarsinnaatitaaneq pillugu inatsit danskit partiivisa allanngortikkusukkaat

AAMMA ATUARUK Inatsisip kinguartinneqarnissaa Venstrep piareersimaffigaa