Paasissutissiinerusalernissaq sulissutigineqassaaq
Nunaqarfinni aqutsisunut qinersinermut paasissutissat annikipput, inernerilu innuttaasunit assersuutigalugu internetimi nittartakkatigut paasiniaavigineqarsinnaarpiarnanilu malinnaavigineqarsinnaanngilaq. Tamannalu Namminersornerullutik Oqartussat akisussaaffigigaat, Kommuneqarfiit Kattuffianni siulittaasoq Jens Lars Fleischer oqarpoq.
- Inatsisit atuuttut malillugit Namminersornerullutik Oqartussat nunaqarfinni qinersititsinerit akisussaaffigaat, uagullu suliakkinneqartinnata namminersorluta paasissutissanik internetimut ikkussuiniarsinnaanngilagut. Jens Lars Fleischer oqarpoq.
Kommunit internetikkut nittartagaanni nunaqarfinni aqutsisunut qinersineq pillugu ulluliisimaneq eqqaassanngikkaanni aamma allassimasoqanngilaq, kommune ataaseq, tassalu Maniitsoq eqqaassanngikkaanni.
Partiit qinersinermut tunngasunik paasissutissaataat aamma annikitsuinnaapput.
Atassut 66-nik Demokraatillu arfineq-marlunnik qinigassanngortitaqarput, Kattusseqatigiilli aamma Siumut Inuit Ataqatigiillu qinigassanngortitaat qasserpiaanersut ilisimaneqanngillat.
Namminersornerullutik Oqartussat internetikkut nittartagaanni paasissutissat aamma annikipput, ulluliineq eqqaassanngikkaanni soqanngivissorluni.
Tamannali allanngortittariaqartoq, naalakkersuisut siulittaasuat nunaqarfinnullu naalakkersuisoq Hans Enoksen oqarpoq.
- Kommunit qinigassanngortittussanik akuersisartuunerat kiisalu qinerneqareersunik akuersisarnerat pissutaasimagunarpoq, Namminersornerullutik Oqartussat matumani eqqumaffiginninnginnerat. Tamannalu allanngortittariaqarpoq. Aamma uanga naammaginngilara nunaqarfimmiut qinersinerat tunulliunneqartutut illutik suusupagineqassappata, taanna massakkut ilungersuullugu allanngortinniassallugu suliarissavarput. Hans Enoksen oqarpoq.
Nunaqarfiit peqatigiiffianni siulittaasoq Karl Tobiassen aamma naliliivoq, nunaqarfinni aqutsisunut qinersineq kommunalbestyrelsenut qinersinernut qanippallaamik inissinneqartarnera soqutigineqarpiannginneranut pissutaaqataasartoq.