Paasissutissiineq apeqqarissaarfiulluartoq

Borgmester Asii Chemnitz Narup 2014-imut missingersuutit akuersissutigineqarneranut atatillugu atuarfeqarfimmi sipaarutissat pillugit paasissutissiinissamut Nuummi soqutiginnittunut tamanut aggersaavoq.
marsip 05-at 2014 06:44

Paasissutissiineq marlunngornermi unnukkut Ukaliusami pivoq. Tamanna apererusussuseqarluartunit 50-init takkussimasunit atorluarneqarpoq.

Tikilluaqqusinermini borgmester Asii Chemnitz Narup atuarfeqarnermi sipaaruteqarnermut tunuliaqutaasut suliallu ingerlarnga pillugit nassuiaateqarpoq.

Pisortaaneq Steffen Ulrich-Lynge, Kommuneqarfik Sermersuup aningaasatigut ilungersunartorsiornera pissutigalugu, ukiuni aggersuni immikkoortuni tamani – aamma atuarfeqarnermi – sipaarniuteqartoqartariaqarneranik nassuiaateqarpoq.

Meeqqanut, Ilaqutariinnut Atuarfeqarnermullu Ingerlatsivimmi pisortaq Søren Valbak aammalu Atuarfeqarnermi pisortaq Hans Peter Broberg kommunalbestyrelsip 10,5 mio. koruuninik sipaaruteqarnissamik aalajangersimanera qanoq piviusunngortinneqassasoq nassuiaateqarfigaat.

Naja Paulsen, paasissutissiinermi aqutsisoq, apeqquteqarniartorpassuit tulleriissaarpai, ilaannilumi nipittuullugu oqaluttoqartarsinnaasarluni.

Apeqqutit amerlangaarmata piffissap isumaqatigiissutigineqareersup iluani tamakkerlugit akineqanngitsoorput.

Partiit siulittaasui Mille Søvndahl Pedersen, Inuit Ataqatigiit aamma Martha Abelsen, Siumut, naggasiillutik oqaaseqarput aammalu borgmester Asii Chemnitz Narup unnuup ingerlaneranik eqikkaalluni.

Piffissami qaninnermi atuarfeqarnermut tunngasut pillugit oqaloqatigiinnerit nanginneqassapput. Borgmesterip Sivso Dorph, Imak-imi siulittaasoq, marsip 13-ani aammalu Nick Nielsen, Ilinniartitaanermut Naalakkersuisoq, marsip aqqarnani ataatsimeeqatiserai.

Ataatsimiinnerit Aningaasaqarnermut Ataatsimiititap suliniuteqarneratigut ingerlanneqassapput.