Paasissutissat pitsaanerusumik ingerlanneqarnissaannut inatsisiliortoqarnianngilaq

Kisitsisitigut Nunatsinni paasissutissat pitsaanerusumik ingerlanneqartariaqarput, kisianni tamanna pillugu Inatsisartunit inatsisiliortoqarnianngilaq.

Johan Lund Olsenip, Inuit Ataqatigiinneersup, inatsisitigut sukaterinissaq siunnersuutigigaluarpaa, tamatumuunakkut inuiaqatigiinni misissuisoqartillugu kisitsisitigut paasissutissanik pitsaanerusunik pissarsisinnaanissaq qulakkeerusullugu. Kisianni tamanna Inatsisartuni amerlanerussuteqartunit itigartinneqarpoq.

Johan Lund Olsenip parteeqataata, aningaasaqarnermut naalakkersuisup, Josef Motzfeldtip, ilisimatitsissutigaa, ullumikkut pillaatitut akiliisitsisoqarsinnaareersoq, pisortat oqartussaasui, suliffeqarfiit, imaluunniit namminersortut, eqqunngitsunik paasissutissiisimappata, imaluunniit paasissutissiinngivissimappata, tassa tamanna Naatsorsueqqissaartarfiup piumasarippagu.

Mannali tikillugu suli akiliisitsisoqarsimanngilaq.

Isumaginninnermut tunngatillugu paasissutissat eqqortut, piffissarlu eqqorlugu kommuninit pissarsiarinissaat, piffissami sivitsortumi ajornakusoortarsimavoq. Tamatumunnga atatillugu naalakkersuisut kingusinnerusukkut siunnersuuteqalersaarput, Josef Motzfeldt oqarpoq.