Paasissutissat piffissaqalerunik saqqummiuniarpaat

Naalakkersuisunut ilaasortat ataasiakkaat aningaasaqarnertik aningaasatigullu soqutigisatik pillugit paasissutissat Namminersorlutik Oqartussat nittartagaatigut avammut saqqummiussinnaatitaavaat, taamaaliornissamullu ulloq killissarititaasoq maajip ulluisa tallimaanni killeqarluni.
Allattoq Mads Lynge
maajip 28-at 2013 15:01

Naalakkersuisunulli ilaasortat arfineq-pingasut akornanni sisamaannaat paasissutissanik saqqummiussisimapput.

Piffissaasuaneq, ullorlu killissarititaasup arajutsisimaneqarnera ilaatigut pissutaavoq, paasissutissanik saqqummiussisimannginnermut:

-Uanga aningaasanik allanik isertitaqanngilanga soqutigisaqarnangalu. Maannamut aamma ulapinnikorujussuugama. Naalakkersuisutullu allamik suliffeqaqqusaannginnerput toqqammavigalugu aamma immersuiartornissaq tuaviuussimanngilara, kisianni ulluni qaninnerni immersoriartortussaavara, allallugu allanik soqutigisaqanngilanga aningaasarsiornertigut. Naalakkersuisutut inuiaqatigiinnut sullissineq taamaallaat massakkut suliffigivara, allanillu soqarnanga,

Inuussutissarsiornermut, Aatsitassarsiornermut Suliffeqarnermullu Naalakkersuisoq, Jens Erik Kirkegaard oqarpoq.

Naalakkersuisunut ilaasortat Naalakkersuisuunertik pissutigalugu allamik suliffeqaqqusaannginnerat, taassuma eqqaasitsissutigaa:

- Inatsisartutut ilaasortaalluni allanik suliffeqarsinnaapput, Inatsisartuinnaanissarlu eqqarsaatigalugu piaarnerusumik immersuisimassagaluarpunga, allanik suliffeqarsinnaaneq taanna aamma toqqammavigalugu, kisianni Naalakkersuisutut inatsisit naapertorlugit allanik suliffeqaqqusaannginnatta, taava allanik aamma isertitaqanngilanga. Naalakkersuisuunera pissutaalluni tuaviuussimanngilara, kisiannili immersornissaa eqqarsaatigiuaannarnikuuara, immersoriartussamaarlugulu, Inuussutissarsiornermut Naalakkersuisoq Jens Erik Kirkegaard oqarpoq.

Aningaasaqarnerminut aningaasatigullu soqutigisani pillugit isertugassaateqannginni,

Ilaqutariinnermut Inatsisinillu Atortitsinermut Naalakkersuisup Martha Lund Olsenip oqaatigaa, paasissutissallu piaarnerpaamik saqqummiunneqarnissaat siunniullugu:

- Suli taamaaliunngilanga, aamma allamik oqaasissaqanngilanga, imatutisertugassaqanngilanga, allamik suliaqarnikuunngilanga, Ilimmarfimmi taamaallaat atorfeqarnikuuvunga, isertitakka tassa taakkuupput,

Ilaqutariinnermut Inatsisinillu Atortitsinermut Naalakkersuisoq Martha Lund Olsen oqarpoq.

Naalakkersuisunut ilaasortat Vittus Qujaukitsoq aamma Miiti Lynge oqaaseqartinniaraluaratsigit iluatsinngilarput.