Paasissutissat isertortut saqqummersinneqangajalerput
Allagartat uppernarsaatitut takussutissat isertuussat qaleriiaatiinnavipput - tamanullu saqqumiunneqariaannaallutik.
Paasissutissat allanut oqaatigeqqusaanngitsut 2,5 millionit internettikkut saqqummersinniarlugit, WikiLeaksip nittartakkami Twitterimi quppernermini ilisimatitsissutigaa.
Qaqugorpiaq saqqummersinneqassanersut, paasissutissallu isertuussat sorpiaanersut, WikiLeaksip taanngilaa. Paasissutissat massakkut saqqummiunneqartussat kingullermik saqqummiunneqartunit amerlanerujussuupput. Kingullermik saqqummiunneqartut Irakimi sorsunnermut tunngasut isertortut 400.000-nngajaat kikkunnit tamanit takuneqarsinnaasimammata.
- Saqqummiussassat tulliuttut, Irak pillugu saqqummiussanit arfineq-marloriaammik amerlanerupput, Wikileaks Twitter aqqutigalugu allappoq.
Irak pillugu nalunaarutit tassapput sakkutooqarnikkut paasissutissat saqqummiunneqartut maannamut annertunerpaat. Tamanna sioqqullugu aprilimi aaqqissuisut Afghanistanimi sorsunneq pillugu paasissutissat isertuussat 77.000-it saqqummiuppaat.
WikiLeaks-ip tunngavilersuutigaa pisariaqartoq paasissutissat tamanut saqqummiunneqarnissaat, inuit paasiniassammassuk sorsunnermi susoqarsimanersoq aammalu naalliutitsisarnernut pasilliinerit ilanngullugit paasineqarniassammata.
