Paasissutissat eqqortut danskit kalaallillu naalakkersuisuisa piniartariaqarpaat

Kingusikkaluartumik paasissutissat upperineqalermata iluariinnarpara, Pituffimmi saleeqataasimasut peqatigiiffiata siulittaasua, Jens Zinglersen oqarpoq.

-Nuannaarutigaara tusagassiorferujussuup BBC-p saqqummiussinera taama aalassatsitsitigimmat, maannakkulli neriuppunga Danmarkimi naalakkersuisut aamma eqiiallakkumaartut, akisussaaffitsillu naapertorlugu kukkussutiginikuusatik nassuerutigalugit, Jens Zinglersen oqarpoq. -isumaqarpunga Pituffiup avataani immap naqqani, ajoquserneqanngingajattumik qaartartoqarnera minnerungitsumik Kalaallit tungaanniit isumakulunnartoqartinneqartariaqartoq. Pituffiup eqqaani malunnartumik qinngornernik ulorianartunik, allanillu toqunartunik mingutsitsisoqarmat, Jens Zinglersen oqarpoq. Kalaallit naalakkersuisuisa Danskit naalakkersuisui peqatigalugit pisimasumut tungatillugit paasissutissat eqqortut piniartariaqarpaat, tamannami kalaallit danskillu pingaartillugu soqutigisariaqarpaat. Isumaqarpunga Avanersuarmiut peqatigiiffitsinnilu ilaasortat eqqortunik paasissutissinneqartariaqalersut, oqaluttualiatummi uppernanngitsutut saqqummiuneqartartut tamaannga killeqartariaqalerput. Maannakkut peqatigiifitsinni ilaasortat sinnerlugit naalagaaffik, EU-Kommissionilu eqqartuussisunut tunniutissavagut. Unnerluussissut ukiup matuma naannginnerani naammassineqareersimassasoq naatsorsuutigaarput, Pituffimmi saleeqataasimasut peqatigiiffiata siulittaasua, Jens Zinglersen oqarpoq.