Paasissutissat akinut tulluartut
-Isumaga malillugu Telep sukkanerusumik internetsersinnaanissamik neqerooruteqarnera kukkuneruvoq, tamutumanimi ikittuinnaat iluaquserneqassapput, pitsaanerussagaluarporlu atuisut akinut tulluartunik internetsikkut aallersinnaaleraluarpata. Ullumikkummi ilaquttagut ikinngutigullu nunami allami najugaqartut attaveqarfigissagutsigit paasissutissanillu assigiinngitsunik aallissagutta atuisutut akit akisoqisut atugassaraagut, Jørgen-Ole Nyboe Nilesen oqarpoq.
Qularutissaanngilaq Nunatsinni internitsimik atuinermi Telep atuisunut akigititaai nunarsuarmi akisunerpaat ilagigaat. Nunattalu sineriaani illoqarfinni mikinerusuni internetsimut attaveqarniarneq ajornaatsuinnaanngilaq. Satellitsikkummi radiokkullu attaveqaatit atorlugit internetsikkut attaveqarniarneq sukkanerpaajunngilaq.
Tele Greenlandip atuisuminut akinik qaffaseqisunik akeqartitsinera Atuisut ilaannit Ib Uldum Sørensenimit Qeqertarsuarmeersumit iluarisimaaneqanngilaq.
-Nuummi najugaqarlunga 1000 koruuninillu akiliuteqartarlunga 15 GB-mik internitsikkut paasissutissanik aallersinnaavunga, maanili Qeqertarsuarni 9 GB-imik taamaallaat aasinnaavara. Isumaqarpungalu tamatumani assigiinngisitsisoqarpallaartoq. Patsisiginiarneqassappat søkabeli tamatumunnga patsisaasoq, tunngavissaqarsorinngilara. Isumaqarpungami sinerissami tamani najugaqartut søkabelimut akilersueqataasut. Soorli taava illoqarfinni allani atugassarititaasut uagutsinnut avinngasusimanerusuni najugaqartunut atuutissanngillat, Ib Uldum Sørensen aperivoq.
Nunani allani attaveqaat ”flatrate” atorlugu akimut aliangersimasumut internetsikkut paasissutissanik killeqanngitsumik aallertoqarsinnaavoq. Tamannali nunatsinni atuutinngilaq. Tamakkaluartorli Tele Greenlandip atuisuminut periarfissanik pitsaanerusunik atugassaqartitsiniarluni pitsaanngorsaajuarsinnaavoq.
- Tamanna angusariaqarpoq, internitsimmimmi atuinermi akit tulluartut atuisunut atugassaasariaqaraluarput. Tamanna anguniarlugu qinersinissami tullermi qinequsaaruteqassaanga, Jørgen-Ole Nyboe Nielsen naggasiivoq.