Paasissutissanik tunniussisarnissaq aalisarnermut inatsisissami nutaami ilaavoq

Kalaallit Nunaanni aalisarnermut inatsisissaq inatsisartut upernaakkut ataatsimiinneranni siullermeerneqassaaq, ukiamullu aatsaat inaarneqassalluni. Taamatut piffissaliinermut peqqutaavoq, susassaqartut tamarmik ukiarnissaanut isummernissamik periarfissaqarniassammata.

Aalisarnermut naalakkersuisoq Finn Karlsen inatsisartut ippassaq ataatsimiinneranni taama nalunaaruteqarpoq.

Inatsisissaq nunatsinneersunut nunanilu allaneersunut ilaatigut pisussaaffiliissaaq, soorlu teknikkikkut, aningaasaqarnikkut, nioqqutissiornikkullu atortut suunerinik Namminersornerullutik Oqartussanut nalunaaruteqartarnissamik.

Taamaasilluni Inatsisartuni Aalisarnermut Ataatsimiititaliami ilaasortap, Ane Hansen-ip, Inuit Ataqatigiinneersup siunnersuutaa, tassa aalisariutit piginnittuinit tunisassiortuniillu paasissutissanik pisalernissaq, ataatsimiititaliamut maannakkut suliareqqitassanngortinneqarpoq.

Taamatut paasissutissanik tunniussisarnissamik piumasaqartarnissaq, partiinit amerlanerussuteqartunit, tassalu IA-mit, Siumumit, Demokraatinit attaviitsumillu Esmar Bergstrømimit tapersersorneqarpoq.

Atassutip oqaaseqartartua, Thomas Kristensen, isumaqarpoq, Ane Hansenip siunnersuutaa ingasappallaartoq.

Lars-Emil Johansen siunnersuummut isumaqataagaluarluni isumaqarpoq, paasissutissat unammillersinnaanermut attuumassuteqarmata, kilisaatinit paasissutissat tunniunneqartartussat isertuulluarneqartassasut.

Johan Lund Olsen IA-meersoq isumaqarpoq, Naalakkersuisunit siunnersuutigineqarsimasumit suli sukanganerusumik piumasaqaateqartoqartariaqartoq.

Aalisarneq pillugu inatsit Inatsisartuni suli eqqartorneqanngilaq, upernaalli ingerlanerani eqqartorneqarumaarluni.