Paasissutissanik pitsaanerusunik katersinialerput
Silaannaap allanngoriartorneranut atatillugu paasissutissat pigineqartut naammanngimmata imaanik silaannarmillu misissuinerit pitsaanerusut pigineqalernissaat anguniarlugu Pinngortitaleriffik misissuilluni aallartereerpoq. Paasisat nutaat nunarsuaq tamakkerlugu ilisimatuunit atorneqarsinnaasunngorlugit saqqummiunneqartassapput.
Pinngortitaleriffimmi ilisimatuutut atorfilik Søren Rysgaard oqarpoq, misissuinerit nutaat pisassiisarnernut kisitsisitaliisarnernik pitsaanerusunik pilersitsissasoq:
- Nunat tamalaat issittumut ukiorititaanit Nunatsinni missuinerit sivisunerusumik ingerlanneqassapput. Immaqa allaat ukiut 50-it tulliuttut nuna tamakkerlugu misissuineq ingerlanneqassaaq. Imaani pissutsit silaannaallu allanngorarneranut atatillugu paasissutissanik pitsaanerusunik peqalernissap anguneqarnissaa siunertarineqarpoq, Søren Ryesgaard oqarpoq nangillunilu: - Maannamut misissuisarnerit atorneqartartut amigaateqarput, anguniarneqartussarlu tassaavoq paasissutissanik sukumiinerusunik katersisoqalernissaa. Taamaasilluni aamma siunissami silaannaap allanngoriartornerata qanorpiaq sunniuteqarnissaa erseqqarinnerusumik oqaatigineqarsinnaalissaaq, aammalu aalisakkat timmissat imaanilu piniagassat allat qanoq amerlatigisut pisassiissutissatut siunnersuutigineqarsinnaaneri erseqqarinnerusumik kisitsisitigut taasinnaalissavagut. Maannakkorpiarmi silaannaap kiatsikkiartornera ilisimatuut isumaqatigiillutik oqaatigisinnaavaat, isumaqatigiinngissutaasartorli tassaavoq suna patsisigalugu silaannaap kiatsikkiartornera pinersoq. Taamaammat qanittumi nunat tamalaat issittumut ukiorititaa ingerlanneqassaaq, tassalu paasissutissanik misisuinernillu ingerlatseqatigiinnissaq tassani siunertarineqarpoq. Tassalu nunarsuaq tamakkerlugu ilisimatuut ataatsimoorlutik paasissutissanik katerseqatigiissapput, paasissutissallu Pinngortitaleriffimmi pigiligassagut tamanit aamma takusassiarineqartalissapput, Søren Rysgaard naggasiilluni taama oqarpoq.
Misissuinerit siullit 1995-imi Tunumi aallartinneqarput, Nuullu eqqaani misissuinerit ukiut marlungajaat matuma siorna aallartinneqarlutik. Sineriak tamakkerlugu misissuinerit ungasinngitsukkut aallartinneqassasut, Søren Rysgaard oqarpoq.
Aamma Nunat tamalaat issittumut ukiorititaanut atatillugu Phd-mik ilinniarnertuut, Nunatta imaanik silaannaanillu tunngatillugu immikkut ilisimasaqalersitsiniarluni ilinniartitsineq Pinngortitaleriffimmiit aallartinneqareersimavoq.
