Paasissutissakimmat Folketingimut allakkatigut qinersinerit atunngitsoorsinaasut

Folketingimut allakkatigut qinersinissami paasissutissat amigaateqarneri New Yorkimiit allakkatigut qinersiniartumut nalornisitsivoq. Ajornartorsiulli aaqinneqartoq, naalagaaffiup nunatsinni sinniisua oqarpoq.

Allakkatigut folketingimut qinersinissami Kalaallit Savalimmiormiullu partiivinik paasissutissanik amigartoqarnera allakkatigut qinersiniartumut nalornisitsivoq. Ajornartorsiulli aaqinneqartoq Kalaallit Nunaanni Naalagaaffiup sinniisoqarfiani rigsombudsmandip oqaatigaa.

Mira Kleist qallunaatut innuttaasuseqarpoq, New Yorkimilu najugaqarallarnini pissutigalugu, folketingimut qinersinissani allakkatigut naammassissariaqarlugu.

USA-miit allakkatigut qinersissalluni nalorninarpoq, qinersininilu ilumut ajunngitsumik naammassinerlugu qularaa:

- Eqqarsarpunga immaqa paativeerunnalaarsinnaasoq, aamma imaakkami kukkusumik allakkukkit immaqaluunniit kommuni kukkusoq allakkukku qinersinerit naleqarnaviannginnamik, New Yorkimi najugalik Mira Kleist taama oqarpoq.

Allakkatigut qinersiniarnermi qineqqusaartut atiinik aammalu partiit paasissutissaanik allattorsimasoqarnissaa silatusaarnerussasoq naalagaaffiit pissusiinnik Københavnimi ilisimatusarfimmi lektori oqarpoq:

- Paasissutissanik allattorsimasoqanngippat, kikkut qineqqusaarnersut eqqaamajuminaasinnaavoq. Taamaattumik massakkut pissutsit taamaatillugit, paasissutissanik, qinersisussap allatulli takusinnaasaannik, allattorsimasoqalernissaa soorunami pisariaqarpoq, lektori Karina Kosiara-Pedersen isumaqarpoq


Nalorninerit kinguneqartartut

Allakkatigut qinersinissami Kalaallit Nunaanni partiit Savalimmiunilu partiit atiinik, paasissutissaanillu allattorsimaffinnik amigaateqarneq ajornartorsiutaasoq naalagaaffiit pissusiinnik Københavnimi ilisimatusarfimmi lektori Karina Kosiara-Pedersen isumaqarpoq.

-Naalagaaffinni aallartitaqarfinnilu allani partiinnut qinersisinnaaneq paasissutissiissutigineqarpat soorunami Kalaallit Nunaani Savalimmiunilu partiit paasissutissaasa allattorsimaffiinnik peqarnissaq pisariaqartoq Karina Kosiara-Pedersen oqarpoq.

Taanna aamma oqarpoq qinersinermi nalorninerit atortussaanngitsumik qinersinermik kinguneqartartut.

- Nalornineq takkukkaangat, qinersinermi tamaangaanartitsineq pilersinnaasartoq naalagaaffiit pissusiinnik Købehavnimi ilisimatusarfimmi lektori oqarpoq.

Mira Klesit 2015-imi folketingimut qinersilerami aamma assinganik nalornissuteqarsimavoq.

Taamani allakkatigut qinersinermi Danmarkimi naatsorsueqqissaartarfik naapertorlugu qinerisuni 308.883-usuni 2.253-it atortussaanngitsutut nalilerneqarput. Taakkualu taasinngitsoornermik nalilerneqaratik kukkusunik nalunaarsorsimasuupput.

Rigsombudsmandip allattorsimaffinni paasissutissat iluarsivai
Mira Kleistip 2015-imi allakkatigut qinersigami paasissutissat annikippallaarneri annerusumik eqqarsaatigeqqinngilai, massakkulli iliuuseqartariaqarluni aaliangerpoq.

Nittartakkakkut attaveqatigiittarfimmi facebookimi misigisani pillugit allappoq. Økonomi aamma indenrigsministerimut misigisani pillugit saaffiginnilluni.

Mira Kleist New Yorkimi najugaqartup qinersiniarnermini nalorninartorsiornini qallunaat nunani namminermi pisutsinut ministereqarfianut saaffiginnippoq, Naalagaaffiup Kalaallit Nunaanni sinniisoqarfiata saaffiginnissutit tiguaat.

Nuannaarutigaara Mira Kleistip ajornartorsiut maluginiarsimammagu, taamaattumik tamanna iliuuseqarfigaarput. Sumiiffinni qinersiviusuni massakkumiit aammalu siunissami paasissutissanik allattorsimaffinnik peqalerpoq.

- Mira Kleistip ajornartorsiut maluginiarsimammagu nuannaarutigeqaara. Taamaattumik tamatumunnga iliuuseqarpugut. Sumiiffinni qinersiviusuni paasissutissanik massakkumiit aammalu siunissami allattorsimaffeqalerpoq, naalagaafiup sinniisaa Mikaela Engell oqarpoq.

Allakkatigut qinersisinnaaneq maajip 15-aniit arfininngornermi juunip aallaqqaataata tungaanut atuuppoq.

Isummersuutit

#FQ2019

Aaja Chemnitz Larsen, folketingskandidat for Inuit Ataqatigiit, afgiver sin stemme til Folketingsvalget i Godthåbshallen i Nuuk. Foto: Christian Sølbeck. (Foto: Christian Klindt Sølbeck/Ritzau Scanpix)

LIVE: Aki Mathilda Høegh Dam aamma Aaja Chemnitz Larsen Folketingimut qinigaapput