Paasisitsiniaanissamik pilersaaruteqareersimagaluarput

Imminorneq, imigassartorpallaarneq, ikiaroorneq naamaartarnerlu pillugit meeqqanik inuusuttunillu paasitsiniaasarnerni Aasiaat Kommuniat nunatsinni siuttunut ilaavoq. Sapaatip akunnerani uanerpiaq naamaartarneq pillugu paasisitsiniaanissaq atuarfik Gammeqarfiup pilersaarusioreeraalu atuartut ilaat naamaarnermi kingorna ippassaani ajunaarpoq. 

Atuarfiup pisortaa Sara J. Brandt pisimasumit attortissimaqisoq oqaluttuarpoq naamaartarneq pillugu paasisitsiniaaneq ukiorpaalunngortuni ingerlassimagitsik, immikkullu atorfeqartitaqarlutik pinaveersaartitsineq ingerlallugu.

Ilinniartitsisoq immikkut atorfeqartitaq pitsaaliuisumik suleqateqarpoq, taakkulu suleqatigillutik pilersaarusiortarput ukiup ingerlanerani paasisitsiniaanissat aaqqissuullugit.

Pinaveersaartitsinermik suliaqartitat taakku tassanngaannaq pisoqartillugu atuaqatiginnut ornigullutik aamma paasisitsiniaasarput. Sapaatit akunnerata matuma siuliani Gammeqarfimmi naamaartoqarsimavoq, tamannalu pissutigalugu sapaatip akunnerata matuma ingerlanerani paasisitsiniaasoqarnissaa aalajangiunneqareersimavoq, niviarsiaqqallu 11-nik ukiullip naamaarnermi kingorna imaanut nakkarluni ipinerata pilersaarutaareersut sakkortusarpaalusooq.

Aasiaat Kommunianni ilaqutariinnik siunnersuisarneq iluatsilluartumik ingerlanneqartoq isumaginninnermi ataatsimiititaliap siulittaasua Bettina C.Geisler oqarpoq. Niviarsiarannguup ippassaani ajunaarnera ajuusaarnartuunerarpaa, sumiluunniilli taama pisoqarsinnaanera erseqqissaatigalugu.

Ilaqutariinnik ikiuinerput pitsaasutut oqaatigisinnaavara. ”Qaammaavik” pilersinnikuuarput siunertaralugu meeqqat ilaqutariillu ajornartorsiutit annertusinnginneranni oqaloqatiginninnissaminnut periarfissinneqarnissaat, taannalu atorluarneqaqaaq, Bettina Geisler oqarpoq.

 Nunatsinni ukiumut inuit marluk naamaarnerminnik toqussuteqartarput, amerlanertigullu inuusuttunnguusarput. Paarisap Naatsorsueqqissaartarfiullu siorna misissuinerisa takutippaat inuusuttut tallimaagaangata ataaseq naamaarnermik misiliisimasartoq, taakkulu affaat siullermeeraangamik 13-t inorlugit ukioqartartut.

Inuk naamaartartoq qaratsamigut ajoqusersinnaavoq misigittaatsunngorluniluunniit. Naamaarneq ajornerpaaffiani toqussutaasinnaavoq.