Paasisat nutaat: Saffiugassat qaqutigoortut aamarsuarnik taarserneqassapput
Kulstoffip nanorøritaata elektronikkimik tunisassiornerup iluani siunissami atorluarneqalernissaat ilimanarluinnarpoq.
Oqarasuaatit angallattakkat qaraasaasiallu atortuini, ullumikkut saffiugassanut qaqutigoortunut pissarsiariuminaatsupilussuarnullu taarsiullugit atorneqartalernissaat ilimanaateqartupilussuuvoq.
Kulstoffilli nanorørii atorneqarsinnaassappata ilisimatuut tunisassiarineqarnerisa aqunneqarnissaat ilikkaqqaartariaqarpaat.
Tamannalu ilisimatuut, ilaatigut Danmarks Tekniske Universitetimeersut ilisimatuussutsikkut misissuinerminni angoqqammerpaat.
- Nunani tamalaani suleqativut peqatigalugit nanorørit ataasiakkaat 'imujartortarnerisa' qanoq aqunneqarsinnaaneranut periaatsimik nassaarpugut, taamaaliornikkullu tunisassiornermik assigiiaartumik aamma nassaarluta.
Saffiugassat innaallagassamullu aqqutilersuutit, halvlederinik taaneqartartut, elektronikkiliornermi atorneqartartut, atortunik kulstoffimit pilersitanik taarsersorneqarnissaannut alloriarnerit siullersaraat, DTU-mi Elektronnanoskopimik ilisimartusarfimmi professori, Jakob B. Wagner, oqaluttuarpoq.
Innaallagissamut aqqutilersuutit, soorlu iridium, arsen galiumilu elektronikkimi kaaviaartitsisartorpassuarnut pisariaqarluinnartuupput qaraasianilu oqarasuaatinilu angallattakkani ullumikkut atorneqartarlutik.
Innaallagissamulli aqqutilersuutit pinngoqqaatinut qaqutigoortunut, taamaattumillu akisuunut, atasuupput.
Tamannarpiarlu pissutigalugu elektronikkiliorfiussuit pinngoqqaatinut qaqutigoortunut, nunguutsinnginnitsinni imaluunniit piiarneqarnerisa akisuallaalinnginnerani, taartissanik nassaarusuttupilussuupput.
