Paasiniaaqqissaartartut misissuillutillu apersuipput

Politiit paasiniaaqqissaartartuisa inuit sisamaasut 29 ukiulimmik Louise Hegelund-imik arfininngornerup ullaavani ulloq 3. februar toqutsisimanermik paasiniaanerit ataasinngormalli suliarilerpaat.

Vicekriminalkommisær Poul B. Andersen politiit paasiniaaqqissaartartuineersoq Radioavisimut paasissutissiivoq, Louise Hegelund savimmik kapineqarluni toqutaasimasoq, savillu toqutsissutaasimasoq politiinit tigummineqarunartoq.

Savik aagasaartoq eqqaaviup puussiartaata iluani toqutsiffiup eqqaani containerimiittoq nassaarineqarsimavoq, puussiami aamma nassaarineqarsimapput Louise Hegelund-ip inaaneersut allat. Tamatuma takutippaa toqutsisuusup toqutsiffimmi uppernarsaataasinnaasut peerniarsimagaluarai.

Inuit marluk politiit ippassaq ujartorpaat – ilaatigut Louise Hegelundip imminnut arfininngornerup ullaavani angerlartilluni tummeqakkut majuarnerani tunuani malinnaasimasumik – aammalu angut ilisimannittunit inimi toqutsiffiusumi igalaakkut nalunaaqutaq sisamap kinguninngua nikorfasoq takuneqarsimasoq.

Ujaasinerlu taanna inuppassuit saaffiginninnerannik ippassaq - ullumimullu allaat - kinguneqarpoq, politiillu saaffiginninnerit tamakkua misissuleruttorpaat aammalu apersugassanik apersuillutik.

Poul B. Andersen-ip oqaatigaa inuit ujartorneqartut, allat assigalugit arfininngornermi Louise Hegelund-imut arfininngornerup ullaakkuani pulaarsimasut politiinut saaffiginnissallutik annilaangassanngitsut.

-Eqqoqqissaartumik ilisimaneqanngilaq toqutsineq qangarpiaq pisimanersoq, taamaattumillu Louise Hegelundip nal. sisamap eqqaani inaaniissimaneq pasinarsaataassanngitsoq, politiit oqarput.

Teknikikkut uppernarsaatissanik nassaartoqareerpoq, taassuunalu qulakkeerneqassaaq inuit pisuussuteqanngitsut toqutsinermut pasineqarsinnaanerannik, taamaattumillu politiit kajumissaaripput inuit attuumassuteqartut imaluunniit ilisimannittut politiinut suli saaffiginnittaqqullugit.