Qaannat peqatigiiffiat Sisimiuniittoq ullut pingajussaa qaannamik Paartoq 2006-imik taallugu parrutsitsipput.
Paartoq 2006 tassaavoq, Sisimiut illoqarfittut 250-inngortorsiorneranut atatillugu innuttaasunik nalliuttorsioqatigiititsinermi ukiormanna pereersut pisussarpassuillu ilaat.
Qajartortartut nunatsinneersut nunanilu allaneersut 19-it peqataapput.
Parrunnermi immikkoortoq siulleq marlunngormat aallartinneqarmat Sisimiunit Assaqutaq aqqusaarlugu Sarfannguanut qaannamik ingerlaarneqarpoq.
Sarfannguaniit Itillimut ippassaq ingerlaarneq nanginneqarpoq ullaaq-mannalu qulingiluanut Itilliminngaanniit Sisimiunut parrunneq aallartissaaq.
25 kilometerini ingerlaarneq innuttaasunut tamanut ammasumik Sisimiut timersortarfissuani unnussiuaaqatigiinnermik naggaserneqassaaq.