Paarnaarussivissami pissutsit ajornerulinnginnissaat anguniarpaa
Kalaallit Nunaanni matoqqasumik paarnaarussivik pilersaarutit malillugit 2014-ip 2015-illu ingerlaneranni naammassineqarpat, isertitsivimmiitinneqartunut atugassarititaasut ajornerulinnginnissaat anguniarlugu sulisoqarnermut aningaasaliissutissat pillugit folketingimut ilaasortap Sofia Rossenip, Inuit Ataqatigiinnersup, Danmarkimi inatsiseqarnermut ministerimut Lars Barfodemut apeqquteqaataa suli akineqanngilaq.
Sofia Rossen isumaqarpoq pissutsit ajornerulissanngippata maannakkut piareersarluni aallartittoqartariaqartoq.
- Justitsministerimut apeqquteqaatiginikuuara, ajoraluartumilli taanna akineqarnikuunngilaq. Taamaammat aamma taanna malersoqqittussaavara, apeqquteqaatinullu nutaanut akissutit ingerlateqqissavakka. Imaakkami paarnaarussiviup sananeqarnissaa kisiat qallunaat naalagaaffianniit aningaasaliiffigineqarnikuuvoq, kisianni illup iluani aningaasartuutissat suli inissinneqarnikuunngillat aamma takussutissaqanngilaq missingersuutinik sumilluunniit, Sofia Rossen oqarpoq.
Isertitsivimmiitinneqartut ilinniarsimasunik oqaloqateqarsinnaanerat maannakkut Herstedvesterimi atugassarititaasumiit ajornerulissanngitsoq Sofia Rossenip pingaartippaa.
- Napparsimaveqarfimminngaanniik psykologit, psykiaterit nakorsat allallu suleqatigilluarnissaat aamma pisariaqartorujussuuvoq. Ullumikkut Hestedvesterimi psykiaterimik oqaloqateqarusukkunik ullut arlariit utaqqisinneqarneq ajorput, kisianni ullup ingerlanerani oqaloqatiginnittarput, taanna aamma pisariaqartorujussuuvoq paarnaarussivik nunatsinnut nuunneqarpat, Sofia Rossen oqarpoq.
