Suleqatigiissitaq nunatsinni politiit pineqaatissinneqarsimasunullu inissiisarfinni nakkutilliisut akissarsiaannut sulinermilu atugaannnut qulaajaasussaasoq naatsorsuinerat tallimanngormat saqqummerpoq.Assi: KNR

Paarnaarussivinni sulisut kattuffiat 5000 koruuninik assigiinngissuteqarneq pillugu: Iliuuseqarfigisariaqarparput

Danskit paarnaarussivinni nakkutilliisut qaammammut akissarsiaat pineqaatissinneqarsimasunut inissiisarfinni nakkutilliisunit kalaallinit assinganik misilittagalinnit 5000 koruuninik amerlanerusut, naatsorsuinerup takutippaa.

Nunarput pinerluuteqarsimasunut nammineq isumaginnittuussappat akissarsiat sulilerusutsitsisinnaasariaqarput.

Paarnaarussivinni sulisut kattuffiata siulittaasua, Bo Yde Sørensen taama oqarpoq. Taanna naapertorlugu akissarsiat qaffanneqartariaqarput.

Siulittaasoq pineqaatissinneqarsimasunut nunatsinni inissiisarfinni sulisut Danmarkimilu paarnaarussivinni sulisut akissarsiaannik naatsorsuinerup saqqummersinneqarnerata kingorna taama oqaaseqaateqarpoq.

AAMMA ATUARUK Qaammammut 7500 koruunit: Kalaallit nakkutilliisut danskinit akissarsiakinnerupput

- Kisitsisit uku tupaallaatiginngilakka, iliuuseqarfigisariaqarpagullu, siulittaasoq oqarpoq, nangillunilu:

- Pinerluttunik Isumaginnittoqarfiup Kalaallit Nunaanit ingerlanneqarnissaa siunertarineqarmat, akissarsiat kalaallinik tassani sulilerusutsitsisinnaasariaqarput.

Akissarsiat sanileriisillugit:

  • Pineqaatissinneqarsimasunut nunatsinni inissiisarfimmi ukiut marluk tungaannut nakkutilliisoq tapisiat aalajangersimasut ilanngullugit 19.365 koruuninik qaammammusisarrpoq.
  • Danmarkimi paarnaarussivimmi ukiut marluk tungaannut nakkutilliisoq tapisiat aalajangersimasut ilanngullugit 24.769 koruuninik qaammammusisarpoq.

Paasissutissanik pissarsiffik: Pinerluttunik Isumaginnittoqarfik

5000 koruuninit amerlanerusunik assigiinngissuteqartut

Danmarkimi paarnaarussivinni ukiut marluk tungaannut nakkutilliisut qaammammut akissarsiaat tapisiat aalajangersimasut ilanngullugit agguaqatigiissillugu 24.769 koruuniusut naatsorsuinerup takutippaa.

Pineqaatissinneqarsimasunut nunatsinni inissiisarfinni nakkutilliisut assinganik misilittagallit qaammammut akissarsiaat tapisiat aalajangersimasut ilanngullugit 19.365 koruuniupput. Tassalu 5400 koruuninik assigiinngissuteqarput.

Sulisarnerisalu sivisussusaat assigiinngissuteqartut naatsorsuisut aamma maluginiarpaat.

Taakku naapertorlugit nunatsinni sulisut sapaatit akunneranut akunnerit 40-t sulisartut Danmarkimi paarnaarussivimmi sulisut sapaatit akunneranut akunnerit 37-t sulisarput.

Siulittaasoq akissarsiat qanoq qaffatsigineqartariaqarnersut aperineqarami ima akivoq:

- Misilittakkakka naapertorlugit inuit pakatsisinneqaannarsinnaammata akissarsiat pillugit kisitsisiliinissannut mianersortariaqartuaannarpunga,

- Kisianni akissarsiat qaammammut 4.500 koruuninik amerlineqarnissaat siusinnerusukkut qinnutigaarput. Taama amerlatigissanersut oqaatiginissaa maannakkuugallartoq merseraara.

Politiitut sulisuni assigiinngissuteqartoqarnerusoq

Suleqatigiissitaq nunatsinni politiit pineqaatissinneqarsimasunullu inissiisarfinni nakkutilliisut akissarsiaannut sulinermilu atugaannut qulaajaasussaasoq naatsorsuisuuvoq. Politiit nunatsinni atorfeqartut politiillu Danmarkimi atorfeqartut akissarsiaat assigiinngitsut aamma nalunaarusiami allami inerniliunneqarpoq.

AAMMA ATUARUK 49,2 millionit koruunit nunatsinni inatsiseqarnermut susassaqarfimmut immikkoortinneqartut

Taannami naapertorlugu Københavnimi politiip atorfineqqammernermini akissarsiai soraarnerussutisiat ilanngunnagit qaammammut 27.218 koruuniusut nunatsinni politiip akissarsiai soraarnerussutisiat ilanngunnagit qaammammut 19.788 koruuniupput.

Danmarkimi politiinut immikkut suliaqanngitsunut akissarsiat qaffasinnerpaaffiat 32.398 koruuniusut, nunatsinni politiinnut akissarsiat qaffasinnerpaat qaammammut 24.815 koruuniupput.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat