Paarlattaasunut aningaasartuutit ikilipput

Nunatta Peqqinnissaqarfiata aningaasarpassuarnik sipaarneratigut, peqqissaaneq pitsaanerusoq, suliffimmi toqqissisimaneruneq aalajaatsunillu amerlanernik atorfinitsitsivittarnerit anguneqarput. Tamakku anguneqarput peqqissaasut taartaaginnarlutik qaammatialunnguani napparsimmavinni sulisinneqarpallaarunnaarmata, taama naqissusiivoq, Nunatsinni Peqqissaasut Kattuffiata siulittaasua, Inuuti Fleischer.

- Minnerunngitsumik sullitanut, tassa napparsimasunut aalaakkaasumik sullinneqarnerulernermik kinguneqarsimavoq, tamannalu malunnaataanerpaasimalluni, Inuuti Fleischer oqarpoq.

Peqqissaasut Kattuffiannit ukiuni kingullerni suliniutigineqarsimavoq, qallunaat peqqissaasut taartaasartut ikilisinneqarnissaat imaluunniit atorunnaarsivinneqarnissaat. Taamaalilluni peqqissaasut atorfeqavissussat amerlisarneqarnissaat siunertarineqarluni.

Peqqissaasunut tikisinneqartartunut piffissamilu sivikitsuinnarmi, ilaatigut qaammatialunnguani sulisinneqartartunut, aningaasat 47,8 million koruunit 2008-mi atorneqarsimapput. Aningaasat siorna atorneqartut tassatuaasimapput 8,3 million koruunit.

Peqqissaasut Kattuffiata ukiuni kingullerni sulissutigaa peqqissaasunik atorfinitsitsivittarnissaq. Tamannalu anguneqarsimalluni.

- Pingaarnerpaajusimavoq sivikitsumik tikisinneqartartunut aningaasarpassuit sulisitsisuniit atorneqartartut atorfinitsitsivittarnernut atorneqarnissaat anguniassallugu, Inuuti Fleischer oqarpoq.

Peqqinnissaqarfiup aningaasarpassuarnik sipaarnera Kattuffiup ilaasortaannaannut iluaqutaaginnanngilaq aammali napparsimasunut sullinneqartunut pitsaanermik sullissinermik kinguneqarsimalluni.

- Peqqissaasut sulinerminni toqqissisimanerulersimapput, tassami assigiimmik suliallit naligiimmik akissarsisarmata. Tamatumalu kinguneraa napparsimasut aalaakkaanerusumik sullinneqalernikkut aamma toqqissisimanerulernerat, Peqqissaasut Kattuffiata siulittaasua, Inuuti Fleischer taama oqarpoq.

Nunatsinni peqqissaasut isumaqatigiissusiornerisa pitsaasup aammalu Danmarkimi peqqissaasut suliffissaaleqinerisa ilutigisaanik, Nunatsinni peqqissaasunik atorfinitsitsivittarnissaq ajornannginnerulersimavoq.