Paarlattaasunut aningaasartuutit ikilipput
Nakorsalli paarlattaasut suli pisariaqartinneqaraluartut, paarlattatasussanik sulisussarsiortarfinnut qanga aningaasartuuterpassuusarsimasut affaannanngortineqarlutik 2012-imi 10 millionit koruuniinnanngorsimapput. Peqqinnissaqarfiup qullersaqarfianit kisitsisit suli saqqummiunneqanngitsut taama takusitsipput.
Nakorsanik atorfinitsitsivinnissaq Nunatsinni napparsimmavinni arlalinni suli ajornakusoortippaat, taamaammallu nakorsanik paarlattaasussanik sulisussarsiortarfinneersunik pissarsisarnissaq suli pisariaqarpoq.
Peqqinnissamulli aqutsisoqarfik naammagisimaarinilluni KNR-imut allappoq, nakorsanut paarlattaasunut aningaasartuutitik 2011-imi 20 millioner koruuniusimasinnarlutik, 2012-imi affaannanngorlutik 10 millionit koruuniummata.
- Paarlattaasussanik sulisussarsiortarfinnut aningaasartuutit siusinnerusukkut qaffasissupilussusimapput, maannali appariangaatsiarsimallutik, Peqqinnissamut aqutsisoqarfimmi aningaasaqarnermut pisortaq Martin Colstrup KNR-imut allappoq.
Paarlattasussanik sulisussarsiortarfinnut aningaasartuutit affaannanngorsimanerat, peqqissaasut akissarsiat pillugit pitsaanerusumik isumaqatigiissuteqarnerat aqutsisullu ajornartorsiummut eqqumaniarnerulersimanerat pissutigalugu paarlattaasunik atuiunnaarlunnngajassimanermik nassuiaateqartippaa.
Naak paarlattasussanik sulisussarsiortarfinnut aningaasartuutit affaannanngoraluartut, aningaasartuutit 2013-imi suli apparteqqinnissaat, paarlattaagallartussanillu sulisussarsiortarfinnik nunani allaneersunik naggataatigut atuiunnaarluinnnarnissaq, Peqqinnissaqarfiup aqutsisoqarfiata sulissutigaa.
- Sulisunik paarlaasseqatigiittarnissamik Danmarkimi napparsimmavinnik isumaqatigiissusiornissaq, Peqqinnissaqarfiup sulisunut sullissinermut immikkoortoqarfiata maanna pimoorullugu sulissutigaa, taamaaliornikkullu paarlattaasussanik sulisussarsiortarfinnut aningaasartuutit 2013-imi suli appaqqinnisaat naatsorsuutigineqarpoq, Peqqinnissamut aqutsisoqarfimmi aningaasaqarnermut pisortaq Martin Colstrup KNR-imut allappoq.